Wezîrê Derve û Cîgirên Serokê Perlemana Îraqê gehiştin Hewlêrê

Kurdistan24 Hewlêr 2023/11/19 23:05

Kurdistan îraq Dihok MEPS23 Hewlêr Zanîngeha Amerîkayî ya Kurdistanê li Dihokê

Navenda Nûçeyan (K24) – Bi merema pişkdarîkirinê di korbenda MEPSê de, Wezîrê Derve û Cîgirên Serokê Perlemana Îraqê gehiştin Hewlêrê û ji aliyê Parêzgerê Hewlêrê ve hatin pêşwazîkirin.

Li gor ragehandina parêzgeha Hewlêrê, berî demeke kêm Parêzgerê Hewlêrê Umêd Xoşnaw li Balafirxaneya Navneteweyî Ya Hewlêrê pêşwaziya Wezîrê Derve yê Îraqê Diktor Fuad Husên û herdu Cîgirên Serokê Perlemana Îraqê Şaxewan Ebdula û Muhsin Mendelawî û şanda pê re kir ku ji Beha Arecî û hejmareke perlemanterên Îraqê pêk hatibû, ku bi merema pişkdarîkirinê di korbenda MEPSê de gehiştine Hewlêrê.

Korbenda Aştî û Ewlehiya Rojhilata Navîn ku wekî MEPS tê nasîn dê li roja 19ê vê mehê li Zanîngeha Amerîkayî ya Kurdistanê li Dihokê bi tevlîbûna zêdetirî 150 kesatiyên siyasî û şarezayên navxweyî û navdewletî bi rê ve biçe, ku K24 dê sponsoriya wê ya medyayî bike.

Di wê korbendê de çend panel bi rê ve diçin ku girêdayî ecêndaya Gera Çarê ya Korbenda Aştî û Ewlehiya Rojhilata Navîn in, ku ji rewşa Îraqê û Herêma Kurdistanê, alingariya ewlehiyê, aborî û siyasî, rewşa ewlehiyê ya Rojhilata Navîn, guhertinên seqayê û berhingarbûna alingariyan û kêmkirina girjiyan pêk tê.

Korbenda Aştî û Ewlehiya Rojhilata Navîn korbendeke salane ye ku ji aliyê Zanîngeha Amerîkayî ya Kurdistanê li Dihokê ve tê rêkxistin, cara yekê li sala 2019ê bi rê ve çû, îsal jî gera wê ya çarê dê bê kirin û dê sê rojan berdewam be.

Li ser astê Herêma Kurdistanê, Serokê Herêma Kurdistanê Nêçîrvan Barzanî, Serokê Hikûmeta Herêma Kurdistanê Mesrûr Barzanî, Cîgirê Serokê Hikûmeta Herêma Kurdistanê Qubad Talebanî, Serokê YNKyê Bafil Talebanî, Wezîrê Navxwe yê Hikûmeta Herêma Kurdistanê Rêber Ehmed, Endamê Mekteba Siyasî ya PDKyê Hişyar Zêbarî û bi dehan kesatiyên din dê tevlî vê korbendê bibin.

Li ser astê Îraqê, Wezîrê Derve yê Îraqê Fuad Husên, Şêwirmendê Ewlehiya Neteweyî ya Îraqê Qasim Arecî, Cîgirê Berê yê Serokwezîrê Îraqê Beha Arecî û çend kesatiyên din dê tevlî vê korbendê bibin.

Diyartirîn kesatiyên navdewletî ku dê tevlî MEPS23ê bibin ev in; Serokwezîrê Berê yê Brîtanyayê Boris Johnson, Wezîrê Berê yê Gencîneya Brîtanyayê Nazim Zehawî, Wezîrê Enerjiyê û Çavkaniyên Xwezayî yê Tirkiyeyê Alparslan Bayrektar, Nûnera Taybet a Sikirtêrê Giştî yê Neteweyên Yekgirtî li Îraqê Jeanine Hennis-Plasschaert, Wezîrê Berê yê Xwarin û Çandinê yê Tirkiyeyê Mihemed Mehdî Eker û çend kesatiyên din ên siyasî, akademî û şareza di warên siyasî û teknolojiya zanyarî de.