Israîl bi şertekî agirbesta mirovî dirêj dike

Navenda Nûçeyan (K24) – Israîl amade ye li beranberî azadkirina 40 revandiyên welatê xwe çar rojên din jî agirbestê dirêj bike.

Li gor zanyarên rojnameya The Wall Street Journal a Amerîkayî, danûstandin ji bo azadkirina 40 welatiyên Israîlî berdewam in.

Biryar e di çend seetên bê de hejmareke din a revandiyan ji aliyê Hemasê ve bê azadkirin, li beranberî wê yekê Israîl jî dê hejmareke din a girtiyên Filistînî azad bike.

Li gor wê lîsta ku Israîlê pêşkêş kiriye, di qonaxa sêyê de welatiyên Amerîkayî dê di nav azadkiriyan de bin.

Agirbesta navbera Hemas û Israîlê ya çar rojî li 24ê Mijdara 2023ê dest pê kir û azadkirina revandiyên Israîlî û zindaniyên Filistînî berdewam e.

Roja 22ê Mijdara 2023ê, Wezareta Derve ya Qeterê di ragehandinekê de eşkere kir, bi hevparî bi Misir û Amerîkayê re di navbeynkariyê de ji bo ragehandina agirbesta mirovî di navbera Israîl û Hemasê de û lihevguhertina hejmareke êxisîr û revandiyan serkeftî bûn.