Li ser raspardeya Mesrûr Barzanî hejmareke pirojeyan li Sêmêlê tê bicihanîn

Navenda Nûçeyan (K24) - Li ser raspardeya Serokê Hikûmeta Herêma Kurdistanê, hejmareke pirojeyên xizmetkariyan li sinorê qezaya Sêmêlê tê bicihanîn û çend birêveberiyên nû jî tên vekirin.

Îro (Duşem, 04.03.2024) Endamê Mekteba Siyasî ya PDKyê û Berpirsê Mekteba Rêkxistinê ya Dihokê ya PDKyê Serbest Lezgîn, Serokê Dîwana Civata Wezîrên Herêma Kurdistanê Umêd Sebah, Parêzgerê Dihokê Elî Teter, Serokê Fermangeha Hevahengî û Lidûçûnê Ebdulhekîm Xesro û Berpirsê Liqa Yekê ya PDKyê Newzad Ebdula bi dezgehên hizbî û hikûmî yên qezaya Sêmêlê re civiyan.

Li dû ragehandineke Nivîsîngeha Ragehandinê ya Parêzgeha Dihokê, di wê civînê de û piştî radestkirina daxwaziyên aliyên peywendîdar ên hizbî û hikûmî li qezaya Sêmêlê, li ser raspardeya Serokê Hikûmeta Herêma Kurdistanê Mesrûr Barzanî, hejmareke biryarên hikûmî yên girêdayî wê qezayê hatin derxistin, wekî:

-         Terxankirina 38 milyar dînaran ji bo pirojeyên nû û pêşvebirina bajarê Sêmêlê, rê û rêbar û avrêjan.

-         Bilindkirina nimreya kargêrî ya tevaya fermangehên qezaya Sêmêlê.

-         Vekirina Birêveberiya Karûbarên Şehîdan û Enfalkiriyan li Sêmêlê.

-         Vekirina Fermangeha Tomarkirina Avahiyan li Sêmêlê.

-         Vekirina Birêveberiya Bajarvaniya Bajarî li Sêmêlê.

-         Vekirina pişkên endazyarî, zatî û qanûnî li Qayimqamiya Sêmêlê.

-         Zêdekirina pêşîneya birêveberiyên Sêmêlê.

-         Vekirina Birêveberiya Bendav û Avrêjan li Sêmêlê.

-         Vekirina Birêveberiya Vîternerî li Sêmêlê.

-         Vekirina Birêveberiya Veguhastinê li Sêmêlê.

-         Çêkirina holeke werzişê ya daxistî û melevangehekê li Sêmêlê.

-         Çêkirina sê bingehên nû yên tendirustiyê.

-         Çêkirina Bingeha Otîzmê li Sêmêlê.

-         Çêkirina sê bingehên civakî li Sêmêlê.