Serok Barzanî û Serokkomarê Tirkiyeyê civiyan

Navenda Nûçeyan (K24) - Serok Barzanî pêşwaziya Serokkomarê Tirkiyeyê kir û bi hev re civiyan.

Serok Mesûd Barzanî îro (Duşem, 22.04.2024) li bajarê Hewlêrê pêşwaziya Serokkomarê Tirkiyeyê Recep Tayyip Erdogan kir û bi hev re civiyan.

Serokê Herêma Kurdistanê Nêçîrvan Barzanî û Serokê Hikûmeta Herêma Kurdistanê Mesrûr Barzanî îro (Duşem, 22.04.2024) seet 20:30 pêşwaziya Serokkomarê Tirkiyeyê Recep Tayyip Erdogan kir.

Di merasîmeke fermî de li Balafirxaneya Navdewletî ya Hewlêrê, Serokkomarê Tirkiyeyê bi serokatiya şandeke bilind a hikûmeta welatê xwe re gehişt Herêma Kurdistanê, ku ev cara yekê ye serokekî Tirkiyeyê serdana Herêma Kurdistanê dike, tevî ku pêştir Erdogan wekî Serokwezîrê Tirkiyeyê jî serdana Hewlêrê kiribû.

Di serdana xwe ya ji bo Hewlêrê de, Serokkomarê Tirkiyeyê Recep Tayyip Erdogan dê bi Serok Mesûd Barzanî, Serokê Herêma Kurdistanê Nêçîrvan Barzanî û Serokê Hikûmeta Herêma Kurdistanê Mesrûr Barzanî re bicive û dê danûstandin li ser peywendiyên navbera Hewlêr û Enqereyê bikin.

Şanda Erdogan ji Wezîrê Derve yê Tirkiyeyê Hakan Fîdan, Wezîrê Navxwe yê Tirkiyeyê Elî Yerlikaya, Wezîrê Bergiriyê yê Tirkiyeyê Yaşar Guler, Wezîrê Enerjiyê yê Tirkiyeyê Alparslan Bayraktar, Wezîrê Bazirganiyê yê Tirkiyeyê Omer Bulat, Serokê Dezgeha Hewalgiriyê ya Tirkiyeyê (MÎT) Îbrahîm Kalin û hejmareke din a wezîr û berpirsên bilind ên Tirkiyey pêk hatiye.

Serdana Erdogan a ji bo Hewlêrê piştî serdana wî ya ji bo Bexdayê tê, ku seet 11:00 ê sibeha îro (Duşem, 22.04.2024) gehişt Balafirxaneya Navdewletî ya Bexdayê û ji aliyê Serokwezîrê Îraqê Mihemed Şiya Sûdanî ve pêşwazî lê hat kirin. Piştî civînan jî, îmza li ser 26 peyman û yadaştên hevfehimandinê hatin kirin.