ئەنەکەسە هێرشەکانی تورکیا بۆ سەر رۆژئاوای کوردستان شەرمەزار دەکات
K24 - هەولێر
ئەنجومەنی نیشتمانی کورد لە سووریا (ئەنەکەسە) هێرشەکانی تورکیا بۆ سەر رۆژئاوای کوردستان شەرمەزار دەکات و داوا لە تورکیا دەکات هێرشەکانی بوەستێنێت.
لە راگەیەندراوێکدا ئەمیندارییەتی گشتی ئەنجومەنی نیشتمانی کورد لە سووریا رایگەیاند، 5ی ئەم مانگە سوپای تورکیا، چەند ناوچەیەکی لە رۆژئاوای کوردستان تۆپباران کردووە و بەهۆیەوە 10 کەس کوژران و بریندار بوون، هەروەها زیانێکی زۆر بە وێستگەی کارەبا، ئاو و ژێرخانی ناوچەکان گەیشتووە و ترس و دڵەڕاوکێی زۆریشی لای خەڵک دروستکردووە.
لە بەشێکی راگەیەندراوەکەدا، ئەنەکەسە داوا لە تورکیا دەکات هێرشەکانی بۆ سەر رۆژئاوای کوردستان بوەستێنێت و داواش لە پەکەکە دەکات دەستوەردان لە کاروباری رۆژئاوای کوردستان نەکات و ناوچەکە لە مەترسی دووربخەنەوە.
ئەنجومەنی نیشتمانی کورد لە سووریا، لە بەشێکی دیکەی راگەیەندراوەکەدا داواش لە کۆمەڵگەی نێودەوڵەتی دەکات، کار لەسەر چارەسەرێکی سیاسی بۆ قەیرانی سووریا بکات و هەنگاوی خێرا لە چوارچێوەی بڕیاری 2254ـی ئەنجومەنی ئاسایش بنێت.
لەلایەکی دیکە بەڕێوەبەرایەتی کەمپی هۆل رایگەیاند، هێرشەکانی تورکیا بۆ سەر رۆژئاوای کوردستان بە تایبەت لە نزیک کەمپی هۆل کاریگەری لەسەر دەزگا و رێکخراوەکانی مافی مرۆڤ کە لە کەمپەکەدا کار دەکەن هەیە، چونکە هەزاران خێزانی داعش لە کەمپەدا هەن.
ئاماژەی بەوەشکردووە، ئەو هێرشانەی تورکیا دەبنەهۆی ئەوەی ژینگەیەکی گونجاو بۆ چەکدارانی داعش بڕەخسێنێت و دۆخی ئەمنی ناوچەکە تێکبچێت.
بەڕێوەبەرایەتی کەمپی هۆل داوا لە کۆمەڵگەی نێودەوڵەتی و رێکخراوەکانی سەر بە نەتەوە یەکگرتووەکان دەکات دەستوەردان بکەن و بەرپرسیارێتی خۆیان بەرامبەر کەمپی هۆل جێبەجێ بکەن.