عارف ڕوشدی: سەرۆکی حکوومەت خۆڕاگر بوو و جوامێرانە لە گۆڕەپانەکەدا مایەوە
K24 – هەولێر
ڕاوێژکاری مەکتەبی سیاسیی پارتی دیموکراتی کوردستان ڕایگەیاند، بابەتی مووچە و بودجەی هەرێمی کوردستان، پرسێکی ناوخۆیی عێراق بوو، ئەگەر هەر لایەنێک ململانێ لەگەڵ هەرێم بکات نەدەبوا بودجە و قوتی خەڵک بکاتە ئامانج.
عارف ڕوشدی، راوێژکاری مەکتەبی سیاسیی پارتی دیموکراتی کوردستان بە کوردستان24ـی ڕاگەیاند، بابەتی مووچە و بودجەی هەرێمی کوردستان، پرسێکی ناوخۆیی عێراق بوو، ئەگەر هەر لایەنێک ململانێ لەگەڵ هەرێم بکات نەدەبوا بودجە و قوتی خەڵک بکاتە ئامانج. چونکە هەر بۆ ناوبانگی خۆیان خراپە.
عارف گوتیشی: ئێستا جیهان بووەتە گوندێکی بچووک، هەروەها ئەو داخوازییانەی ئێمە لەسەر بودجە و مووچە بۆ هەموو جیهان ئاشکرا کراوە، بۆیە لە کۆمەڵگەی نێودەوڵەتییدا خاڵێکی زۆر نەرێنی بوو بۆ حکوومەتی عێراق.
ئاماژەی بەوەش کرد، پێداگری سەرۆکی حکوومەت و تیمەکەی، ئەرکەکانیان بەباشی جێبەجێ کرد و نەچوونە ژێر باری بڕیارە ناڕەواکان، چونکە ئەوان دەیانەویست بابەتی مووچە و بودجە بکەنە ڕێگەیەک بۆ دەستشکاندنی هەرێمی کوردستان.
ڕاویژکارەکەی مەکتەبی سیاسی پارتی دەشڵێت: سەرۆکی حکوومەت خۆڕاگر بوو و جوامێرانە لە گۆڕەپانەکەدا مایەوە، هەروەها ئەو هاوکارییەی وەریگرتووە هاوکاریی میللەت بووە، دواتر هاوکاری پارتی و لایەنە نیشتیمان پەروەرەکان بووە.