سه‌ڵاحه‌دین به‌هادین له باره‌ی تێوه‌گلانی یه‌كگرتوو له "مامه‌ڵه‌ی بیتكۆین و وه‌نكۆین" روونكردنه‌وه‌یه‌ك ده‌دات
K24 - هه‌ولێر:
سه‌ڵاحه‌دین محه‌مه‌د به‌هائه‌دین، ئه‌مینداری گشتی یه‌كگرتووی ئیسلامی كوردستان، له په‌یجی فه‌رمی خۆی له تۆڕی كۆمه‌ڵایه‌تی فه‌یسبووك، روونكردنه‌وه‌یه‌كی له باره‌ی (بتكۆین) و (وەنكۆین)، كه دوو دراوی ئه‌لیكترۆنین، بڵاو ده‌كاته‌وه و ره‌تیده‌كاته‌وه حزبه‌كه‌ی له پشته‌وه‌ی ره‌واجپێدان بێت به‌و دراوانه.
به گوێره‌ی روونكردنه‌وه‌كه‌ی ئه‌مینداری گشتی یه‌كگرتووی ئیسلامی، بەهیچ جۆرێك دوور و نزیك ئەم بازرگانییە وەهمی و ناڕوونە، پەیوەندی بە حیزبەوە نییەو، ئێمەش لە زاری خەڵكەوە بیستوومانە كە كەسانێك توش بوون و مومارەسەی ئەكەن و، بازاڕی بۆ گەرم ئەكەن، ئەوە كارێكی شەخسییەو خۆیان وەك شەخس بەرپرسن لە ئەنجام و بەرهەمی كارەكەیان.
ده‌قی روونكردنه‌وه‌كه‌ی ئه‌مینداری گشتی یه‌كگرتوو:
"رونكردنەوەیەكی پێویست
ماوەیەكە گفتوگۆ لەسەر بابەتی (بتكۆین) و (وەنكۆین) دەكرێت، كە گوایە كاسپییەكە لەناو یەكگرتووەكاندا رەواجی پێ دەدرێت و یەكگرتووی لە پشتەوەیه، بۆ بەرچاو روونی و ئاگاداری هەموو لایەك دەڵێین:
1- لایەنی فیقهی و یاساییەكەی بەجێ دەهێڵم بۆ زانایانی شارەزا، كە فتوای ئاشكرایان لەسەر داوەو، بە كارێكی ناروون و شوبهەو بێ رەسید و بێ زەمانەت ئەیناسێنن و، كەسی موسڵمانی پابەند بە رزقی حەڵاڵ خۆی بەدوور ئەگرێ لە شتی وا گوماناوی.
2- لەبارەی پەیوەندی بە یەكگرتووە راشكاوانە رایدەگەیەنین، بەهیچ جۆرێك دوور و نزیك ئەم بازرگانییە وەهمی و ناڕوونە، پەیوەندی بە حیزبەوە نییەو، ئێمەش لە زاری خەڵكەوە بیستوومانە كە كەسانێك توش بوون و مومارەسەی ئەكەن و، بازاڕی بۆ گەرم ئەكەن، ئەوە كارێكی شەخسییەو خۆیان وەك شەخس بەرپرسن لە ئەنجام و بەرهەمی كارەكەیان.. ئێمەش تەوسییە ئەكەین كە ئەندامانی یەكگرتوو خۆیان بەم كاسبییە وەهمییەوە خەریك نەكەن و، پارەی حەڵاڵی خۆیان با كەمیش بێ، لەو زۆرە خەیاڵییە باشترە.
3- هەر لەو بارەیەوە جەخت لەوە دەكەینەوە كە مەرجەعی شەرعی ئەم جۆرە بابەتانە تەنیا زانایانی شەرعییە، نەك ئەو كەسانەی كە خۆیان تووش بوون و، بە كەمێك شارەزایی و رۆشنبیریی ئاینییەوە دەیانەوێ ئەم كارە گوماناوییە بشەرعێنن و، قسەی ئەهلی عیلم و فتواو پسپۆڕی پشتگوی بخەن.
سەلاحەدین محەمەد بەهائەدین
ئەمینداری گشتی یەكگرتووی ئیسلامیی كوردستان
2/1/2018"