Li Dihokê bi hezaran dar hatin çandin
Navenda Nûçeyan (K24) – Bi hezaran dar li ser 100 donim erd li bajarê Dihokê hatine çandin. Parêzgarê Dihokê jî dibêje: “Me daxwaza 100 donim zeviyên din kiriye, da ku bi hezaran darên din jî biçînin.”
Îro 16ê Mijdara 2023an, bi amadebûna Parêzgarê Dihokê Dr. Elî Teter, li Parka Alûka ya bajêr li zeviyeke 100 donimî, zêdetirî 3 hezar dar hatin çandin.
Parêzgarê Dihokê spasiya Konsulxaneya Hollandayê û hemû aliyên ku alîkariya cîbicîkirina wê projeyê kirine kir û got: “Çandina daran ne bes e, ya girîngtir çavdêrîkirin û parastina daran e, heta ku mezin bibin.”
Got jî: “Ji bilî van 100 donim zeviyên ku dar lê hatine çandin, min daxwaz ji rayedarên pêwendîdar kiriye ku 100 donim zeviyên din jî bidin me, ji bo daran biçînin û çavdêriya wan bikin.”
Elî Teter got: “Em hewl didin proseya çandina daran li parêzgeha Dihokê berdewam bikin; Daxwazê ji hemû qeymeqam û rêveberên navçeyan dikim ku li her cihê ku pêwîstî bi çandina daran hebe ji me re amade bikin û agahdar bikin. Em bi niyaz in ku zêdetir navçeyên parêzgehê kesk bikin.”
Parêzgarê amaje bi bûyera birîna 4 daran li Dihokê kir û got: “Ez spasiya hemû wan kesan dikim ku li dijî birîna hejmarek daran li navenda Dihokê nerazîbûn nîşan dabûn, tevî ku berê destûr hatibû dayîn ku ji bo danîna hejmarek kamerayên lezê, ew dar bên birîn, lê bi dîtina vê hişyariyê em gelekî kêfxweş bûn ku komek ji ciwanên me li dijî birîna daran bi vî awayî nerazîbûn nîşan dan. Hêvîdar im ku ew di parastina jîngeha xwe de berdewam bin.”
Parêzgarê Dihokê tekez kir jî: “Li şûna her darekê, me daxwaz kiriye ku bi dehan dar bên çandin û çavdêrîkirin heta ku mezin bibin.”
Herwiha got: "Bi her awayî birîna daran qedexe ye. Divê her kes hevkariya Hikûmeta Herêma Kurdistanê bike, da ku rûbirûyî wan kesên ku daran dibirin û jîngehê têk dibin, bibin.”
