عەبادی لەبارەی ھەرەسھێنانی سوپای عێراق ھۆشداری دەدات
K24 - ھەولێر
سەرۆك وەزیرانی عێراق ھۆشداری لەبارەی دووبارەبوونەوەی رووخانی سوپا لەبەرامبەر داعش دەدات.
لە كۆبوونەوەیەكدا لەگەڵ سەرۆك ھۆزەكانی ناوچەی معامل لە رۆژھەڵاتی بەغدا حەیدەر عەبادی، سەرۆك وەزیرانی عێراق رایگەیاند: "جێگەی سەرسوڕمانە سەركەوتنی درۆینەی چەكدارانی داعش بڵاودەكرێتەوە، كە كاریگەری نەرێنی لەسەر ئەمنی وڵات و خەڵك بەجێدەھێڵێت"
گوتیشی: "بۆچی ببینە داردەستی داعش بۆ بڵاوكردنەوەی ئەم جۆرە ھەواڵانە".
ھەروەھا حەیدەر عەبادی، ھۆشداریدا لەبارەی دووبارەبوونەوەی رووخانی سوپا لەبەرامبەر داعش، لە ئەگەری بڵاوكردنەوەی زیاتری ھەواڵی ھێرش و سەركەوتنەكانی داعش لەناوچە جیاجیاكانی عێراق.
ئەمە لەكاتێكدایە، كە ماوەیەكە چەكدارانی داعش لە عێراق دەستیان بە چالاكی كردووەتەوە و چەند كردەوەیەكی تیرۆرستیان ئەنجامداوە و ژمارەیە كە ھێزەكانی عێراق و چەكدارانی حەشدی شەعبیان كوشتووە.
سەردانی عەبادی بۆ ناوچەی معامل، دوای ئەوەدێت كە لە چەند رۆژی رابردوودا خەڵكی ئەو ناوچەیە دژی حكوومەتی عێراق خۆپێشاندانیان ئەنجامدابوو.
ھ.م