ئاسايشى كه‌ركووك: كه‌ركووك كراوه‌ته سه‌ربازگه و دۆخی شاره‌كه‌ش به هێزه عێراقیه‌كان ناپارێزرێت
K24 – هه‌ولێر:
به‌ڕێوه‌به‌ری ئاسایشی كه‌ركووك بۆ كوردستان24 رایگه‌ياند، ره‌وشى ئه‌منى شارى كه‌ركووك به هێزه‌كانی عێراق ناپارێزرێت و ئه‌وان پێویستیان به هێزی پێشمه‌رگه هه‌یه.
ئیدریس ره‌فعه‌ت، به‌ڕێوه‌به‌ری ئاسایشی كه‌ركووك له ميانى به‌شداريكردنى له گه‌شتى هه‌واڵه‌كانى كاتژمێر (08:00)ى كوردستان24 رايگه‌ياند، شارى كه‌ركووك كراوه‌ته سه‌ربازگه و دۆخی شاره‌كه‌ش به هێزه ئه‌منییه‌كانی عێراق ناپارێزرێت و ئه‌وان پێویستیان به هێزی پێشمه‌رگه‌یه.
روونيشيكرده‌وه، له دواى داگيركردنى شارى كه‌ركووكه‌وه، پیلانێك بۆ ته‌عریبكردنه‌وه‌ی ناوچه‌كه هه‌یه.
له چه‌ند رۆژى رابردوودا، به‌رپرسانى يه‌كێتى نيشتيمانى كوردستان له كه‌ركووك له چه‌ند بۆنه‌ى جياواز و به به‌ياننامه‌يه‌ك داوايان كرد، هێزى پێشمه‌رگه و ئاسايش بگه‌ڕێنه‌وه كه‌ركووك.
هاوكات له به‌ياننامه‌يه‌كدا، مه‌ڵبه‌ندى دووى يه‌كێتى هه‌ڕه‌شه‌ى كردبوو، ئه‌گه‌ر ئارامى شاره‌كه پارێزراو نه‌بێت، شه‌قام ده‌جوڵێنن بۆ داواكارى گه‌ڕانه‌وه‌ى پێشمه‌رگه و ئاسايش و هاوكات پێشنيازى پێكهێنانى هێزێكى هاوبه‌شى له نێوان پێشمه‌رگه و ئاسايش و هێزه ئه‌منييه عێراقييه‌كان كردبوو.
ئه‌مڕۆش، ئه‌نجوومه‌نى عه‌ره‌بى له پارێزگاى كه‌ركووك له به‌ياننامه‌يه‌كدا ره‌تيكرده‌وه، رازى بن به گه‌ڕانه‌وه‌ى پێشمه‌رگه و ئاسايش بۆ شارى كه‌ركووك.
راشيگه‌ياند، ناكرێت دزه‌كردنێكى ئه‌منى داعش ببێته هۆى شكاندنى كه‌رامه‌تى پێكهاته‌كانى ديكه‌ى كه‌ركووك.