منداڵانی دوو دایەنگەی سلێمانی چوارڕیانی سەرچنار خاوێن دەکەنەوە

K24- هه‌ولێر:

دوێنێ سێشەممە(17/07/2018)هەردوو دایەنگەی جاف تاوەر و نەورۆز لە شاری سلێمانی، هەڵستان بە ئەنجامدانی چالاکییەک، تیایدا مامۆستا و قوتابییان پێکەوە، حەوزی چوارڕیانی سەرچناریان لە زبڵ و خاشاک پاکردەوە، یەکێک لە قوتابییەکانیش داوا دەکات "گەورەکان ئەو شوێنانە جارێکی دیکە پیس نەکەنەوە".

بەگوێرەی بڵاوکراوەیەکی دایەنگەی جاف تاوەر کە لە پەیجی خۆیان لە تۆڕی کۆمەڵایەتی فەیسبووک بڵاویانکردۆتەوە:"منداڵانی ھەردوو دایەنگەی جاف تاوەر و شاری نەورۆز ئەرکی پاککردنەوە و سەرپەرشتی کردنی باخچەی چوارڕیانی سەرچناریان لە ئەستۆ گرت و لە داھاتووشدا بەردەوام دەبن لەم ئەرکە".

دییە فریای تەمەن پێنج ساڵ، یەکێک لە قوتابییە بەشداربووەکانی چالاکییەکە، بەم جۆرە بۆ کوردستان24 لەبارەی پاکردنەوەی حەوزی چوارڕیانەکە دوا: "گەورەکان شوێنەکەیان زۆر پیسکردبوو. پڕ بوو لە شووشەی شکاو و حەوزەکەش وشکبوو بوو. ئێمە پاکمان کردەوە و ماسیشمان خستە ناو حەوزەکە".

لای خۆیەوە یەکێک لە بەڕێوەبەرانی دایەنگەکە لە لێدوانێکیدا بۆ کوردستان24 لەبارەی هەڵبژاردنی حەوزی چوارڕیانەکە رایگەیاند: "بەهۆی دروستکردنی بەرزە پردەکە. ماوەیەکی زۆر ئێرە(حەوز و باخچەکە) فەرامۆشکراوە".

بەڕێوەبەرەکە گووتیشی، مامۆستایان دوو رۆژ پێشتر، بۆ ماندوونەکردنی زۆری منداڵەکان، بەشێکی زۆری شوێنەکەیان پاککردۆتەوە.

H.J