بۆچی دژایەتی سەربەخۆیی دەكرێت؟
گەلی كورد بە درێژایی سەدەی رابردوو لە نەھامەتیدا ژیاوە و تووشی دەیان كارەسات بووەتەوە، ھەر لە راگواستن و كوشتن و بڕین و ئەنفال و جینۆساید و قڕكردن و دەیان كارەساتی دیكەی دوور لە ھەموو بەھا مرۆییەكان. خاوەن مێژوویەكی تاڵین و گەلێك جار دەرفەتی زێڕینیشمان ھەبووە، بەڵام ھەمیشە ناكۆكییە ناوخۆییەكان دەرفەتەكانیان لەبار بردووین.
پێم وایە ئەگەر لەگەڵ وڵاتە داگیركارەكانمان رێك بووینایە، بمان ویستایە تەنھا وەك ھاووڵاتییەك بژین و بە مافی سەرەتایی ھاووڵاتییبوونێكی ئاسایی رازی بووینایە، ئەوا بە تایبەت لە باشووری كوردستان، نە كارەساتێكمان تووش دەبوو، نە ئەو ھەموو شەھید و بریندارەمان دەدا، نە تووشی راگواستن و ئەنفال و ھیچکام لە كارەساتەكان نەدەبووین، بەڵام درێژەدان و خەباتی كورد ھەمیشە بۆ ئەوە بووە وەك كورد قەوارەیەكی سەربەخۆمان ھەبێت، رازی نەبووین وەك نەتەوەیەك بەبێ ناسنامە بژین لە ژێر سایەی حكوومەتێكی دیكە.
بەڵام كورد چەكی ھەڵگرت بۆ ئەوەی بە مافی خۆی بگات و بە ناسنامەی كوردبوونییەوە لە ژێر ئاڵای سەربەخۆیی بژێت، بۆ ئەوەی رۆژێك قەوارەیەكی ھەبێت وەك وڵاتێكی سەربەخۆ و تاكەكانی پراوەی مافەكانی ھاووڵاتیبوون بكەن لە چوارچێوەی دەوڵەتی كوردستان، ھەربۆیەش ئەو كارەساتانەی تووش بوون.
دوای ئەو ھەموو خەبات و قوربانیدانە، ئاسۆكانی دروستبوونی ئەو قەوارە سەربەخۆیە (بە كەموكوڕییەكانییەوە) بە روونی دەركەوتوون، بە تەواوی نزیكبووینەتەوە لە راگەیاندنی دەوڵەتی سەربەخۆ، لە واقیعدا بە تەواوی سەربەخۆین و تەنھا ریفراندۆم و بە فەرمی راگەیاندنی ماوە. راستە كەموكوڕی ھەیە و لە ساڵانی رابردوودا حكوومەت نەیتوانیوە لە ئاست قۆناخی دوای ئێستا ئامادەكاریی پێویست بكات و پلانی درێژخایەنی ھەبێت، راستە نەتواندراوە لە رووی ئابوورییەوە بە تەواوی ئەو ھەرێمە تۆكمە بكرێت و بەرھەمی ناوخۆیی زۆربكات و دەست بە سەرچاوەكانییەوە بگرێت و بە زاناییەوە بەكاریان بھێنێت، بەڵام چەم بێ چەقەڵ نابێت و مەرج نییە لەو قۆناخەدا دووربین لە ھەموو كێشەیەك و دونیا ببێتە شامی شەریف. لە دایكبوونی دەوڵەتی كوردی ژانی زۆری گەرەكە، بەشێك لەو ژانانە تێپەڕیون و بە دڵنیاییشەوە ژانی دیكە دروست دەبن، بەڵام زیاتر لە سەدەیەكە قوربانی دەدەین، كە ئێستا نزیك بووینەتەوە لە گەیشتن بە لوتكە، ماندووبوون و قوربانی دیكەی پێویستە و پێشم وایە كورد زۆر لەوە ئازاترە و بەرگەی ئەو ژانەش دەگرێت، كە لە كۆتاییدا خەونەكەی وەدی دەھێنێت.
ئەوەی جێگەی نیگەرانییە، ھەست دەكرێت لە كوردستاندا بە بیانووی جیاواز، دژایەتی پرۆژەی دەوڵەتی كوردی دەكرێت، لە ئاستی جیاواز و بە رێگەی جیاواز ھەوڵدەدرێت خەڵكی لەوە ھان بدرێن كە راگەیاندنی دەوڵەت مەترسیدارە، بەڵام بە شێوەیەكی زانایانە، خەڵكی وا تێدەگەیەندرێت ئەگەر ئەو ھەنگاوە نرا، ئیدی دونیا دەبێ بە دۆزەخ، خەڵكی لە برسان دەمرن و كوردستان دبێت بە گۆڕەپانی شەڕ، تۆقاندنی خەڵك بەشێكە لەو پڕۆژە بێ ناوەڕۆك و بێ مانایە. خەڵك و ھێزە سیاسییەكان، نوخبە و رۆشنبیران، تەنانەت شارەكانیش لەبارەی ئەو پرۆژە دابەشبوون، ھۆكاری ھەرە سەرەكی ئەو دابەشبوونەش سیاسەت و دەستكەوتی حزبی و بەشێكیشی كەسییە.
زۆر لەوە دڵنیام، ئەگەر بە درێژایی مێژوو، كورد یەكگرتوو بوایە، خۆی بەم و بەو نەلكاندایە، دژایەتی یەكتری نەكردایە و كۆك بوایە، دەمێك بوو كۆماری كوردستان ھەبوو لە باشوور و لە پارچەكانی دیكەش بە ھەمان شێوە، رەنگە ئەوە بۆ بەر لە دابەشكردنی كوردستانیش راست بێت، نەخۆشییەكی ھەرە درم و مەترسیدار لە نێو كورد دا بڵاوە كە ھەرگیز بە چارەسەربوونی گەشبین نیم، دژایەتیكردنی یەكتری و خۆ خۆرییە، لەبەر ئەوەی ئەو بەو ئامانجە نەگات دژایەتی دەكەم، لەبەر ئەوەی فلان ھێز یان فلان كەس بەو كارە ھەڵساوە من دژی دەوەستمەوە، بۆ ئەوەی ئەو كارە نەبێتە دەستكەوتی ئەو حزبە خەڵكی لێ ھان دەدەم و دژایەتی دەكەم، لە ھەمووشی كارەساتبارتر ئەوەیە نوخبە و راگەیاندن و رۆشنبیران بكەونە ژێر كاریگەریی ئەو دژایەتی و گەمە سیاسییە شكستخواردووە.
گەیشتن بە سەربەخۆیی، خەون و ئاواتی ھەموو كوردە، ھێنانەدی ئەو خەونە پێویستە كارنامە و ئامانجی ھەموو ھێزە سیاسییەكان بێت، پێویستە راگەیاندن بیكاتە پڕۆژەی ھەرە ستراتیجی خۆی و رۆشنبیران پاڵپشت و ھاوكاری ئەو پڕۆژەیە بن، پێویست ناكات ترس لەنێو خەڵكی بڵاوبكرێتەوە سەبارەت بەو ئامانجە مێژوییە، پێویستیش ناكات لەبەر دژایەتیكردنی یەكتری، ئەو ھەموو خەبات و خوێنەی گەلەكەمان بەفیرۆ بدەین و بیكەینە قوربانی دەستكەوتە حزبییەكانمان.
كورد وەك گەورەترین نەتەوەی بێ دەوڵەت، زۆرترین قوربانی داوە بۆ گەیشتن بەو خەونە، ھەموو ھێزە سیاسییەكان بایی خۆیان شەھید و قوربانییان داوە، كەم بنەماڵە ھەن شەھید و پێشمەرگەیان نەبێت و قوربانییان نەدابێت، كەم كەس ھەیە لە منداڵییەوە خەونێك بە ناوی سەربەخۆیی لە ناخیدا نەڕوێندرابێت، تاوانێكی گەورەیە لە خۆمان و گەلەكەمان دەكەین و خیانەتێكی مەزنیشە لە خوێنی شەھیدانمان دەیكەین، ئێستا ھەوڵی لەباربردنی ئەو خەونە بدەین، ھەرھێزێكیش خۆی بە لایەنێكەوە بلكێنێت كە دژایەتی پڕۆژەكە بكات، ستەم لە خۆی و ئاییندەی خۆی دەكات و دواجار میللەت سزای دەدات.
دەوڵەتی كوردی، سەربەخۆیی كوردستان خەونی ھەموومانە و زۆرینەمان بە تاسەوەین رۆژێك بێت لە ژێر سایەی ئاڵای كۆماری كوردستان بژین. بە خوێن پاڵپشتی ھەر ھێز و كەسێكم ھەڵگری ئەو پڕۆژەیە بێت و خەونەكانمان وەدی بێنێت، كەسیش بە تەنھا خاوەنی ئەو پڕۆژەیە نییە و پڕۆژە و ئاواتی ھەموانە، بۆ ئەوەی زوو خەونەكەش وەدی بێت، پێویستە ھەموومان ھاوكار و پاڵپشت بین و دواجار ئەو وڵاتەی درووست دەبێت ھی ھەموانە نەك ھی ھێز و كەسێك، بۆیە پێویست بە گومان و دژایەتیكردنی ناكات.