" 30 " سەرباز و پۆلیسی عێراق لە هێرشەکەی ئەمڕۆی بەغدا کوژران
K24- هەولێر
بە گوێرەی چەند بەرپرسێکی عێراق کە بۆ بی بی سی دواون لە هێرشەکەی چەکدارانی داعش ئەمڕۆ بۆ سەر شارۆچکەی ئەبو غرێب لە نزیکی بەغدا 30 سەرباز و پۆلیسی عێراق کوژراون.
سەرچاوەکانی بی بی سی راشیانگەیاندووە کە: "لە هێرشەکەی ئەمڕۆی چەکدارانی داعش بۆ سەر بنکەیەکی سوپای عێراق لە ناوچەی ئەبو غرێب 30 سەرباز و پۆلیس کوژران".
بە گوێرەی سەرچاوەکان داعش هێرشەکەی ئەمڕۆی لە ئەبو غرێب بە تەقاندنەوەی سێ ئۆتۆمبێلی بۆمبرێژکراو دەستپێکرد و دواتر شەڕ و پێکدادان لە نێوان چەکدارانی داعش و هێزە ئەمنییەکانی عێراق روویدا.
هاوکات ئاژانسی ئەسۆشەیتد پرێس لە زاری سەعد حەربیی، فەرماندەی هەڵمەتە سەربازییەکان لە رۆژئاوای بەغدا رایگەیاند: "دۆخەکە لە ناوچەکە لە ژێر کۆنتڕۆڵدایە و هێزە ئەمنییەکان هاتووچۆیان لە ناوچەکە قەدەغە کردووە".
پێشتر یوسف ئەلعەبادیی، لە راگەیاندنی وەزارەتی ناوخۆی عێراقەوە تایبەت بە ماڵپەڕی (کوردستان24)ی راگەیاند: "کۆمەڵێک لە چەکدارانی داعش بەیانی ئەمڕۆ هێرشیان کردە سەر ناوچەکانی ئەلعبادیی و هیتاویین لە شارۆچکەی ئەبو غرێب لە نزیکی شاری بەغدا، بەڵام هێزە ئەمنییەکان رووبەڕوویان بوونەوە و ئێستا زۆری نەماوە شەڕ و پێکدادانی نێوان هەردوولا کۆتایی بێت".
ئەلعەبادیی گوتیشی: "داعش بە ژمارەیەک چەکدار و بە دوو خۆکوژەوە هێرشی کردە سەر ئەو ناوچانە و لە شەڕ و پێکدادانەکانی نێوان ئەوان و هێزە ئەمنییەکان خۆکوژەکان کوژران و چەند چەکدارێکی دیکەشی گرووپەکە کوژراون، بەڵام هێشتا زیانەکان بە وردیی نەزانراون".
ئەمە لە کاتێکدایە لە رۆژی هەینیی رابردووەوە سوپا و هێزە ئەمنییەکانی عێراق هەڵمەتی سەربازیی فراوانیان دەستپێکردووە بۆ گرتنەوەی شارۆچکەی فەللوجە لە رۆژئاوای عێراق کە لە سەرەتای ساڵی 2014 لە بندەستی چەکدارانی داعشدایە و نزیکەی 40 کم لە پایتەختی عێراقەوە دوورە.
هاوکات شارۆچکەی ئەبو غرێب کە ناوچەیەکی سەر بە بەغدایە و سوننە نشینە لە سەرەتای سەرهەڵدانی داعشەوە لە عێراق تا ئێستا ئامانجێکی سەرەکیی گرووپەکە بووە بۆ گەیشتن بە فڕۆکەخانەی نێودەوڵەتیی بەغدا و بەردەوام هێرشی چەکدارایی و خۆکوژیی لەو ناوچەیە روو دەدات.
ئا: ئا ، ف