بە بیانوی ڕاپەرینەوە !؟
هەندێک گرووپی نوێ، بە بیری پۆپۆلیستانەوە دەسکەوتەکانی ڕاپەرینی بەهاری 1991ی کوردیان قبوڵ نییە و تەواوی جوانیەکانی دەخەنە ژێر پرسیاری جەبریی، بەڵام دەستکەوتەکانی دەسەڵاتی حەشدیی مەزهەبی و ئاینی شیعەو فیوداڵی عەرەبیی بە ئیختیاریی پیرۆز دەکەن!
ئەو گرووپانە خۆشبەختانە دوای بیرەوەریی، 30 ساڵەی چەخماخەی راپەڕین هێشتا کەمینەیەکن لە کۆمەڵگه و لەسەر شەقام و کاراییان ئەوەندە نییە هەیەجان دروست بکەن. بەڵام بە بیانووی ناشەفافی نەوت و گەندەڵییەوە خەریکی ریسکی مەترسیدارن لەگەڵ نەیارانی قەوارەی هەرێم.
ئەوان کە چەمکی دەوڵەت نەتەوەیان قبوڵ نییە و دژی سەربەخۆیی و قەوارەی ئازاد و خاوەن بڕیاری هەرێم دەوەستنەوە روانگەیەکی دروستیان نییە بۆ رووداوەکان. کەچی خەریکن لە یادی راپەڕینەکانی ئادار و نەورۆز و هەڵەبجەدا هەموو جوانییەک ناشیرین دەکەن بەو ئازادی و دیموکراسیەشەوە کە هەیە، ئەمەش بەبیانووی گەندەڵی ئیداریی و مووچە و دەرماڵەی هاووڵاتیان. ئەو تایپە سەما و ماکیاژی ساختەیان پێباشترە لە بەغداد لەبەردەم بزووتنەوەی مەزهەبیی زاڵی شیعیی بەبێ هیچ پرێس کۆنفرانس و بیانوویەک، لە کوردستانیش خەریکی گێڕانەوەی چیرۆکی بێمتمانەکردن و بێ ئینتیماکردنی خەڵکن لەخۆڕا، گوایە لەبەر شکۆی خەڵک و فەزیلەتی تاک و خۆشگوزەرانی هاووڵاتیان و مووچەکانیان هەموو هەوڵێک دەخەنەگەڕ، ئەو گرووپانەی کوردستانیان دابەش کردووە بۆ ڕەش و سپی و رەیسیزمێکی خەتەریان بۆ شارەکان دروست کردووە بەناوی هەرێمچێتی و لامەرکەزیی ئیداری و مالی، دەبێ ئەوە بزانن کاریگەریی خراپی دەبێ بۆ ئایندەی خۆیان پێش هەرکەس، گرنگە لەبری بێئومێدکردنی خەڵک، گوتاریی سیاسی و ئەجێندای خۆیان پاک بکەنەوە لە جەهل و نیفاق و لە کوردستان و سەرداربەڕوەکان قسەیەک نەکەن و لە ژێر دارخورماکانیش قسەیەکی تر.
ئەو گروپەی دژی مەزهەب و کولتووری خێڵ و دەرەبەگایەتییە لە هەرێم، ناکرێت لە ناو پەرلەمانی عێراق و بارەگای ئاغايان و برادەران لە ناوچەی سەوز و کازمیە و ئەبونەواس بە سیاسەتی ئاینی و تەقلیدیی و نەخوێندەوارترین قەبیلە و فیوداڵی مەزهەبی دینی و شیعی رازی بن و موبارەکە و موبادەرەی پرۆژەکانیان بکەن بۆ مەبەستی دەستکەوتی کەسی و مانەوەیان لە بەغداد. ناکرێ لە بەغداد خەنی بن بە وێنەگرتن لەگەڵ عەبا ڕەشەکانی نەجەف بۆ وەرگرتنی پۆست و ئیمتیاز لێرەش کوچک لە ئاگر گەرمتر دژی دەستکەوتەکانی راپەرین بوەستنەوە، ئاخر کاراکتەری سیاسی هەیە دژی راپەڕینی مێژویی میللی و جڤاکی و دەستکەوتەکانی نەتەوەو نیشتیمانەکەی بوەستێتەوە؟
باشە دەکرێت بپرسین بۆچی لە عێراق ورتەیان لێوە نایەت و ڕازین لەگەڵ ماڵبات و خانەوادە زاڵەکانی شیعە و عەمامە بەسەرەکان و سیاسەتی مەرجەعیەت و حەوزە کاربکەن بە شانازیە، کەچی لە هەرێم دانوویان لەگەڵ کەس ناکوڵێ و باسی یەکسانی و دادوەریی و سیکولاریزم و مەدەنیەت دەکەن و دەستکەوتەکانی راپەرین سووک و ریسوا دەکەن لەبەرچاوی رای گشتی.
بەو هەموو فەساد و خوێنبەربوونەوە لە عێراق گرووپگەلە مافیاکانی شیعەیان قه‌بوڵە و دەستیان دەگرن و ڕێبەرییان دەکەن بۆ ئەوەی قەوارەی هەرێم کۆتایی پێبهێنن و خۆشیان دوو فلسیان دەستبکەوێت کەچی باسی یەک کێماسی و مافیاگەریی و بەهەدەردانیکی سامانی ژێر زەوی و سەرزەوی ناکەن بەتەنیشت خۆیانەوە. ئەم ئاراستەیە بنەماخوازییەکی تیۆری و فیکرییشیان نییە تیۆریزەی خۆیان پێبکەن بۆ ئاییندە، بەداخەوە لەسەر دوو جووڵە و کاریتەی سیاسی سەتحی کاردەکەن، یەکەمیان پەرچەکردار و حەماسەتە بۆ هەڵبژاردنی ئاییندە و گەیشتن بە چەورایی نەوت و بەرژەوەندیی حزبیی و دژایەتی و کاردانەوە بەرامبەر دەسەڵاتەکانی هەرێم. کە بۆ زانیاریی ئەوەش ئاسان نییە کەمکردنەوەی دەسەڵاتەکانی هەرێم بەپێی بنەما دەستوورییەکان و یاساکانی دادگای فیدراڵی کە نابێت هەمواریی دەسەڵاتەکانی ستاتۆی هەرێم بکرێت. هەرکات ئەو نیەتە شۆڤێنیستییەش هاتە ئارا، سێ پارێزگای هەرێم بۆیان هەیە تانەی بکەن و دژی ئەو بریارە بوەستن.دوەمیان؛ شوێنپێ کەوتنی ژاوەژاوی سیاسی و تائیفی و مەزهەبییە کە دەوڵەتی مەزهەبی دروستی کردووە بۆ برسیکردن و نابووتکردنی کورد، کە ناشیرینترین جووڵەی ئەم تایپەی دەوڵەتی مۆدێرنی عێراقەو لەیادی ڕاپەڕیندا هەندێک گروپ بەتایبەتی هاوپەیمانی هیوا مارکێتینگی شەرمنانەی بۆ دەکەن.