مەندووبی کەیفسازی حساب بۆ نەکراو!
هەندێک مەندووبی حساب بۆ نەکراوی وادە تەواوبوو، خانەنشینی بندەستی یاسا جەبرییەکانی حەشدی شەعبی عێراقن، کە زۆر کەیفیان بە سوکایەتی و جنێو دێت بە پیرۆزییەکانی نەتەوە و نیشتمان و وادەزانن مووچە و ئیمتیازەکانیان لە نەبوونی قەوارەی هەرێم پارێزراو دەبێت و عێراق ئیتر وڵاتێکی دامەزراوەیی و دەستووریی دیموکراسییە و ئەوان هەرئاوا بە کەیف و سەفا دەمێننەوە بۆ مەدح و سەنا!
باشترە مەندووبی حساب بۆ نەکراو، بەمەبەستی لێدان لە قەوارەی هەرێم و خزمەتکردن بە ئەجێندای حەشدی شەعبی و ئیتاری تەنسیقی و مالیکی و خەزعەلی و سەنەدییەکان و کیلابی زمانەکان، ئەوەندە ئیش لەسەر میزاجی شەقام و ختوکەدانی خەڵک و رای گشتی کوردستانی نەکەن.
خۆ دەزانن کە سیاسەتکردن بریتی نییە لە قیڕەقیڕ و دەنگە دەنگ و زاهیرەی سەوتی و رۆشتن بۆ بەغداد بە ئۆتۆمبێلی جامڕەش و ناسنامەی کۆن و پارێزبەندی ئێکسپایەرەوە، خۆ سیاسەتکردن شرۆڤە نییە لەسەر مووچەی تێر و پاسپۆرتی دیپلۆماسی و وشە ریزکردن، هەروەک بریتی نییە لەوەی هەیە و بووەتە رووداو، سیاسەت بریتییە لە هاوکێشە ئەمنی و نەخشە نادیارەکان و بکەرە شاراوەکان، حەزم لێیە مەندووبی دەنگبەرزی ناقۆڵایی مەزهەبیی کوردیی دیوە شاراوەکەی سیاسەت ببینن چونکە بۆ بەرپێی خۆیان باشترە تا نەگلێن، چونکە سەدان جار گلان و فێرنەبوون.
دەزانن لە کەیەوە باسی گۆڕانکاری و شۆڕش و دادگەری و شتی وادەکەن هەر لەدوورەوە، کەچی ناشیەنە سەرشەقام و منداڵەکانیشیان هەر نازانن ناڕەزایەتی و بایکۆتی قوتابخانەکان چییە بەهۆی خوێندنی پرایڤت و هایکۆستەوە، کە لەسەر رەنج و عارەقە و خوێنی خەڵکی ناڕازیی وەری دەگرن و دەیخۆن!
دادگەری و دادپەروەری و هات و هاوار بۆ ماف، پێش ئەوەی تیۆری و قسەکردن بێت سلوک و رەفتارە، لێرە قسە لەسەر سیستمی کۆنی داڕزاوی خوێندن و پەروەردە دەکەیت، ئەوە دادگەرییە بە مەرجێک خۆت هەبیت لەو سیستمەدا و زەجر بکێشیت بەدەستییەوە، بەڵام کاتێک کچ و کوڕەکەت بە پارەی دوو حکومەتی کوردی و عێراقی و ئیمتیازە بەدەستهاتووە نادیارەکان دەنێریتە باشترین خوێندنگە ئەهلییەکان و زانکۆکانی ئیستانبوڵ و هایدڵبێرگ، ئەوە بەدڕەفتارییە و نەریتی خان و خێڵ و ناعەدالەتییە و وەک پاڵەوان مەیفرۆشە بە خەڵک، مەندووبی ئاوا مەندووب و چاودێر و یاسادانەر نییە بەڵکو دەوەن بەئاشە (قیڕە و هەرای بێسوود) لەناو مەتبەخێکی گەرمی پشتیوانیکراوی موخابەراتی مەزهەبیدان و بوونەتە پڕۆکسی (الوکیل) وڵاتانی دژە هەرێم و بەڕاست و چەپدا وێنەی ناشیرینی ئەم هەرێمە دەکێشن و سەنەمی بێڕۆحی بۆ دائەتاشن.
سێبەرە گەورەکان جوڵەی بێدەنگ دەکەن، ئێوەش هەر قیڕەقیڕ و دەنگەدەنگ و خەڵکیش دەبێ نائومێدی بچنێتەوە، هەموومان دەڵێین؛ نەفرەت لە دۆخی گەندەڵی و بێمووچەیی و بێ بەرنامەیی ئەو ساڵانەی فێڵمان لێ کرا، دەی لەو ساڵانەی رابردوو کە فێڵی بودجە و دادگا و سکاڵامان لێکرا، ئێوە گەر جورئەت و شەهامەتی ئەوەتان هەبا، چوار یاساتان دەنوسییەوە بۆ پاراستنی ماف و ئیمتیازەکانی فەرمانبەرانی هەرێم و زەمان کردنیان، وەک چۆن بۆ خۆتان نووسییەوە بەزەمان و دەستەبەری کۆمەڵایەتی عێراقییەوە؟