كۆمه‌ڵی دادگه‌ری: ئیدانەی هەرجۆرە دەستدرێژیی و لەشكركێشیی و بۆردومانێک دەكەین
K24 – هه‌ولێر:
راگەیەندراوەکەی ئەنجومەنی باڵای کۆمەڵی دادگه‌ری كوردستان راگه‌یه‌ندراوێكی له باره‌ی هێرشی ئه‌مڕۆی ئێران بۆ سه‌ر باره‌گای لایه‌نه رۆژهه‌ڵاتییه‌كان بڵاوكرده‌وه.
له راگه‌یه‌ندراوه‌كه‌دا هاتووه: ئێمە لە كۆمەڵی دادگەریی كوردستان، ئیدانەی هەرجۆرە دەستدرێژیی و لەشكركێشیی و بۆردومانێک دەكەین بۆسەر خاكی هەرێمی كوردستان .
هه‌روه‌ها هاتووه: پێویستە لەسەر دەوڵەتانی دراوسێ و هێزە نەیارەكانیشیان كە ڕێز لە سەروەری عێراق و هەرێمی كوردستان بگرن و، خاكی هەرێمی كوردستان نەكەنە گۆڕەپانی یەكلاكردنەوەی شەڕ و ناكۆكییەكانیان و، كارێك نەكەن كە خەڵكی كوردستان ببێتە سوتماكی ئەم شەڕ و بۆردومانانە .
ده‌قی راگه‌یه‌ندراوه‌كه
دەقی راگەیەندراوەکەی ئەنجومەنی باڵای کۆمەڵ:
ڕاگەیەندراوێك بۆ ڕایگشتیی
بەناوی خوای بەخشندەی میهرەبان
جارێكی دیكە چەند ناوچەیەكی هەرێمی كوردستان كەوتەوە بەر بۆردومانی وڵاتانی دراوسێ و، بەداخەوە كە بۆردومانەكان قوربانیی لێكەوتوەتەوە و، ترسی و دڵەڕاوكێ و نائارامییەكی زۆریشی لەناو هاوڵاتییاندا دروستكردووە .
ئەمە یەكەمجار نیە كە هەرێمی كوردستان دەكەوێتەوە ژێر پەلامار و بۆردومانەكانی وڵاتانی دروسێ، لەكاتێكدا هەرێمی كوردستان بەشێكە لە دەوڵەتی عێراقی فیدراڵ و، ئەم بۆردومانانەش پێشێلكردنی سەروەریی خاكی عێراقە
ئێمە لە كۆمەڵی دادگەریی كوردستان، ئیدانەی هەرجۆرە دەستدرێژیی و لەشكركێشیی و بۆردومانێک دەكەین بۆسەر خاكی هەرێمی كوردستان .
داواش لە هێزە ئۆپۆزسیۆنەكانی ئێران دەكەین كە بنكە و بارەگاكانیان لەو شوێنانە دووربخەنەوە كە ناوچەی نیشتەجێبوون، تا هاوڵاتیانی مەدەنی نەبنە قوربانیی بۆردومان و ململانێكان .
پێویستە لەسەر دەوڵەتانی دراوسێ و هێزە نەیارەكانیشیان كە ڕێز لە سەروەری عێراق و هەرێمی كوردستان بگرن و، خاكی هەرێمی كوردستان نەكەنە گۆڕەپانی یەكلاكردنەوەی شەڕ و ناكۆكییەكانیان و، كارێك نەكەن كە خەڵكی كوردستان ببێتە سوتماكی ئەم شەڕ و بۆردومانانە .
لەسەر حكومەتی فیدراڵیی عێراق و هەرێمی كوردستانیشە، كە ڕێوشوێنی پێویست بگرنەبەر لەپێناو پاراستنی گیانی هاوڵاتیانیان كە هیچ تاوانێكیان لەم ململانێیانەدا نیە .
كۆمەڵی دادگەریی كوردستان
ئەنجومەنی باڵا