پەکەکە لەبارەی تەقینەوەکەی ئیستانبوڵ هاتە دەنگ
K24 - هەولێر:
پەکەکە سەرەخۆشی لە کەسوکاری قوربانیانی تەقینەوەکەی ئیستانبوڵ دەکات و رەتیدەکاتەوە هێرشەکەی ئەنجامدابێت.
هەریەک لە پەکەکە و (هەسەدە) هێزەکانی سووریای دیموکرات رەتیدەکەنەوە لەپشت تەقینەوەکەی دوێنێی ئیستانبوڵەوە بن.
راگەیەندراوی ئەم دوو لایەنە لەکاتێکدایە کە ئەمڕۆ حکومەتی تورکیا پەنجەی تۆمەتەکانی بۆ ئەو دوو لایەنە درێژکرد و رایگەیاند، ئەنجامدەری هێرشەکە لە عەفرین لەلایەن ئەوانەوە راهێنانی پێکراوە.
دوێنێ یەکشەممە 13/11/2022، تەقینەوەیەک لە شەقامی ئیستقلالی شاری ئیستانبوڵ روویدا، بەگوێرەی دوایین ئامار شەش کەس گیانیان لەدەستداوە و 80 کەسی دیکەش بریندارن.
کونسوڵخانەی عێراقیش لە ئیستەنبوڵ لە راگەیەندراوێكدا سەبارەت بەو تەقینەوەیە رایگەیاند، چوار لە بریندارەكانی تەقینەوەكەی دوێنێی شەقامی ئیستقلال لە ئەستەنبوڵ، عێراقیین.