ده‌میرتاش: هەڵوێستەکانی باباجان گرنگ و بوێرانەن
K24 – هەولێر
سەلاحەدین دەمیرتاش، هاوسەرۆکی پێشووی پارتی دیموکراتی گەلان (هەدەپە) ستایشی هەڵوێستەکانی عەلی باباجان سەرۆکی گشتی پارتی دیموکراسی و پێشکەوتن (دەڤا)، لەبارەی پرسی کورد دەکات.
سەلاحەدین دەمیرتاش لە زیندانەوە، قسەی لەسە دوالێدوانەکانی عەلی باباجان لەبارەی پرس و مافی کورد کرد و بە رۆژنامەنووسانی راگەیاند، "هەڵوێستەکانی باباجان گرنگ و بوێرانەن و هەوڵەکانی جێگەی پێزانینە".
پێشتر سەرۆکی گشتی پارتی دیموکراسی و پێشکەوتن (دەڤا)، رەخنەی لە چەند ماددەیەکی دەستووری هەمیشەیی تورکیا گرتبوو و دووپاتیکردبووەوە، "ئێمە گرنگی بە مەسەلەی کورد دەدەین و دەمانەوێت ئەو پرسە بە دادپەروەرانە و ئازادی چارەسەر بکرێت."
عەلی باباجان لە سەردانی رۆژی چواری کانوونی یەکەمدا بۆ دیاربەکر، بۆ رۆژنامەنووسان قسەی کرد و رایگەیاند، "دەبێ دەوڵەت هیچ فەرق و جیاوازییەک لە نێوان هاووڵاتیانیدا نەکات".
چەند جارێکە باباجان راستەوخۆ رەخنە لە ماددەکانی 66 و 42ـی دەستووری هەمیشەیی تورکیا دەگرێت. لەو خاڵانەدا باس لەوە کراوە، هەموو هاووڵاتییەکی تورکیا، تورکن و پەروەردە دەبێ تەنیا بە زمانی تورکی بێت.
سەرۆکی گشتی پارتی دەڤا، لەوبارەیەوە رایدەگەیەنێت، "ئێمە دەبێ بێترس قسە لەسەر ئەو خاڵانە بکەین، چ خاڵی 66 یان 42 یان هەر خاڵێکی دیکە، ئێمە بە گوێرەی سەردەمی نوێی تورکیا، لە دەستووری نوێدا جارێکی دیکە ئەو خاڵانە بە نوێی دەنووسینەوە."
باباجان گوتیشی: هەموو هاووڵاتییەکی تورکیا وەک یەکن. دەبێ مرۆڤ بژیت، تاکو دەوڵەت بژیت. کێشەی هاووڵاتیانی عەلەوی و پێکهاتەی دیکەی ئایینیش هەیە، پێویستە ئەو کێشانە چارسەر بکەین.