سهرۆك بارزانی: بژاردەی سەرەكی گەلی كوردستان لە هەموو قۆناغێكدا ئاشتی بووە
K24 - ههولێر:
شاندێكی پارتی دیموكراتی گهلان (هەدەپە) بە سەرۆکایەتی پەروین بوڵدان هاوسەرۆکی هەدەپە لە پیرمام لەگەڵ سەرۆک بارزانی كۆبوونهوه.
شاندی باڵای پارتی دیموكراتیی گەلان (هەدەپە) پێكهاتبوو لە پەروین بۆڵدان هاوسەرۆكی گشتیی هەدەپە و ئۆسمان بایدەمیر و فەلەكناز ئۆجا و ئیمام تاشجیەر و زەینەب بۆغا پارلەمانتارانی هەدەپە و موزەیەن گونەش و عابید ئیكە نوێنەرانی ئەو حزبە لە هەرێمی كوردستان.
لە دیدارەكەدا شاندی باڵای هەدەپە سەرەخۆشییان لە سەرۆك بارزانی كرد بەبۆنەی كۆچی دوایی دلۆڤان ئیدریس بارزانی و هاوخەمیی خۆیان بۆ سەرۆك بارزانی دەربڕی. وێڕای ئاماژەدان بە كێشە و تەحەددیاتی بەردەم گەلی كوردستان لە توركیا و عێراق و گۆڕانكاری و پێشهاتەكانی ڕۆژئاوا و شەڕی عەفرین ئەوەیان خستەڕوو كە دیداریان لەگەڵ سەرۆك بارزانی لەو كات و ساتەدا زۆر مانا دەگەیێنێت.
هەروەها ڕۆشناییان خستەسەر رووداوەكانی دوای ریفراندۆم و جەختیان لەوە كردەوە كە كێشەكانی بەردەم گەلی كوردستان لە ناوچەكەدا پەیوەستە بە یەكتر و داوای هەماهەنگی و راوێژی نێوان لایەنە سیاسییەكانی كوردیان كرد.
لە بەشێكی دیكەی ئەو كۆبوونەوەیەدا شاندی میوان باسیان لە دەرئەنجامی كۆنگرەی حزبەكەیان كرد و كورتەیەكیان لە رەوشی سیاسیی توركیا و بارودۆخی هاووڵاتیانی كورد و كار و چالاكییەكانی هەدەپە بۆ سەرۆك بارزانی شی كردەوە.
لەبەرانبەردا سەرۆك بارزانی بە گەرمی بەخێرهاتنی شاندی باڵای هەدەپەی كرد و سوپاسی هەڵوێستی ئەو حزبە و كوردانی باكووری كرد.
هەروەها رۆشنایی خستەسەر وردەكاری رووداوەكانی دوای ریفراندۆم و تەئكیدی لەوە كردەوە كە بژاردەی سەرەكیی گەلی كوردستان لە هەموو قۆناغێكدا ئاشتی بووە و هەمیشە شەڕی بەسەردا سەپێندراوە.
سەرۆك بارزانی داوایشی كرد كە پێویستە هەموومان لەسەر ڕێگەچارەی واقعیانە و ئاشتیانە بگەینە ئەنجام و لەگەڵ ئەوەیشدا زمانی زۆرداری و چەك و خۆسەپاندن ئەنجامی نابێت.
هەر لەو كۆبوونەوەیەدا هەردوولا لەسەر ئەوە هاوڕا بوون كە لەسەر پێشهاتە نوێیەكان و رێگەچارەسەرەكان لە پەیوەندی و راوێژی بەردەوامدا بن.
لەو كۆبوونەوەیەدا ئازاد بەرواری و مەحموود محەمەد ئەندامانی مەكتەبی سیاسیی و عەلی حوسێن ئەندامی سەركردایەتی و ئومێد خۆشناو سەرۆكی فراكسیۆنی پارتی دیموكراتی كوردستان لە پارلەمانی كوردستان ئامادە بوون.