له‌ به‌رده‌م په‌روه‌رده‌ی پشده‌ر له‌ قه‌ڵادزێ خۆپیشاندانه‌

K24 - هه‌ولێر:

بۆ جارێکی دیكه‌ قوتابیانی پۆلی 12 ی ئامادەیی لەبەردەم بەڕێوه‌بەرایەتی پەروەردەی پشدەر دەستیان بە خۆپیشاندان کردەوە، قوتابیانی خۆپیشاندەر داوا دەکەن وەزارەتی پەروەردە وەک تاقیکردنەوەکانی کۆتایی ساڵ، تاقیکردنەوەی وەرزیش 100% بکاتە هەڵبژاردن.

پێشتر مامۆستا محه‌مه‌د کەریم، بەڕێوه‌بەری پەروەردەی رانیە بە کوردستان 24ی راگەیاند، بڕیاری 50 بە 50ی وەڵامی پرسیاری تاقیکردنەوەکانی وەرزیی، پەیوەندی بە ئەوان و وەزارەتی پەروەردەوە نییە و راسپاردەی کۆنگرەی پەروەردەییە، بەڵام لەسێ ساڵی رابردوو بەهۆی بایکۆتی مامۆستایان نەتوانراوە جێ بەجێ بکرێت.

ئاراس ئه‌مین، په‌یامنێری كوردستان 24 له‌ راپه‌ڕین رایگه‌یاند، هێزه‌كانی پۆلیسی چالاكییه‌ مه‌ده‌نییه‌كان له‌ شوێنه‌كه‌ن و خۆپیشاندان و گردبوونه‌كه‌ش هێمنانه‌یه‌ و مه‌به‌ستی قوتابیانیش ته‌نها گه‌یاندنی داواكانییانه‌.

هه‌فته‌ی رابردووش، قوتابیانی ده‌ڤه‌ری راپه‌ڕین له‌به‌رده‌م هه‌ریه‌ك له‌ په‌روه‌رده‌كانی پشده‌ر له‌ قه‌ڵادزێ و راپه‌ڕین له‌ رانیه‌، خۆپیشاندانی ناڕه‌زایه‌تییان رێكخست، ئه‌مڕۆش بۆ هه‌مان مه‌به‌ست له‌ قه‌ڵادزێ گردبوونه‌ته‌وه‌.

ئ. م