چاکسازیی لە خزمەتگوزاریەکانی سەنتەرە پسپۆرییەکان دەکرێت
بۆ خستنە ڕووی ڕێکارەکانی چاکسازیکردن لە بواری خزمەتکردنی هاووڵاتیان لەبواری تەندروستی و هێنانی دەرماندا، وەزیری تەندروستی لەگەڵ سەنتەرە پسپۆڕیەکانی کەرتی تایبەت لە هەرێمی کوردستان دووپات لە بەرزکردنەوەی کوالێتی کۆنتڕۆڵ و ڕێگەگرتن لە کاری نایاسایی دەکاتەوە.
سێشەممە 6ـی ئابی 2024، وەزارەتی تەندروستی بڵاوی کردەوە، بەئامادەبوونی سامان بەرزنجی وەزیری تەندروستی و بەڕێوەبەرانی گشتی و نوێنەری سەرۆکایەتی داواکاری گشتی و بەڕێوەبەرایەتی کوالێتی کۆنتڕۆڵی جۆری و پشکنین و بەدواداچوون، کۆبوونەوەی فراوان لەگەڵ بەڕێوەبەری سەنتەرە پسپۆڕیەکانی کەرتی تایبەت لە هەرێمی کوردستان بەڕێوەچوو.
وەک وەزارەتەکە ئاماژەی بۆ کردووە، کۆبوونەوەکە بەمەبەستی خستنە ڕووی ڕێکارەکانی چاکسازیکردن لە بواری خزمەتکردنی هاووڵاتیان و دابینکردنی دەرمان و پێداویستی پزیشکی و بەرزکردنەوەی ئاستی کوالێتی و هێنان و بردن بەڕێگای فەرمی، لەگەڵ چەسپاندنی سیستەمی نوێی کارکردن و نرخ و کۆنتڕۆڵکردن و ڕێگەگرتن لە کاری نایاسایی و نافەرمی ڕێکخرا.
