ئەمیر عوسمان: هەرێمی کوردستان تابلۆی پێکەوەژیانە لە ڕۆژهەڵاتی ناوەڕاست
سبه‌ی ڕۆژی نزای نیشتمانیی له هه‌ولێری پایته‌ختی هه‌رێمی كوردستان به‌ڕێوه ده‌چێت؛ هاوكات به‌ڕێوه‌به‌ری پێكه‌وه‌ژیانی ئایینی له وه‌زاره‌تی ئه‌وقاف و كاروباری ئایینی حكوومه‌تی هه‌رێمی كوردستان ده‌ڵێت، هه‌رێمی كوردستان وێنه و تابلۆیه‌كی جوانه بۆ پێكه‌وه‌ژیان و له‌خۆگرتنی ئایین، مه‌زهه‌ب، ئایینزا و نه‌ته‌وه و پێكهاته جیاوازه‌كان، ئه‌م وێنه و تابلۆیه‌یش له ناوچه‌كه ده‌گمه‌نه و بووه‌ته سیمبۆڵێكی به‌هادار.
سێشه‌ممه، 22ـی نیسانی 2025، ئه‌میر عوسمان، به‌ڕێوه‌به‌ری پێكه‌وه‌ژیانی ئایینی له وه‌زاره‌تی ئه‌وقاف و كاروباری ئایینی حكوومه‌تی هه‌رێمی كوردستان به كوردستان24ـی گوت، ڕێوڕه‌سمه‌كه بۆ یه‌كه‌م جاره له هه‌رێمی كوردستان، عێراق و ناوچه‌كه به‌ڕێوه ده‌چێت و تێیدا نوێنه‌رانی پێكهاته جیاوازه‌كانی كوردستان و جیهانیش به‌شدار ده‌بن، ئه‌مه‌ش به‌ڵگه له‌سه‌ر پێشكه‌وتنی هه‌رێمی كوردستان له بواری پێكه‌وه‌ژیانی نێوان پێكهاته‌كاندا.
ئه‌میر عوسمان ئاماژه‌ی به‌وه‌ش كرد، به‌شداریی هه‌ر یه‌ك له سه‌رۆك بارزانی، نێچیرڤان بارزانی، سه‌رۆكی هه‌رێمی كوردستان و مه‌سرور بارزانی، سه‌رۆكی حكوومه‌تی هه‌رێمی كوردستان له ڕێوڕه‌سمه‌كه‌دا هێمایه‌كی سه‌رنجڕاكێشه و مانای ئه‌وه‌یه هه‌رێمی كوردستان چووه‌ته ناو قۆناغێكی باڵا و گرنگتر له ناوچه‌ی ڕۆژهه‌ڵاتی ناوه‌ڕاستدا.
به‌ڕێوه‌به‌ری پێكه‌وه‌ژیانی ئایینی له وه‌زاره‌تی ئه‌وقاف و كاروباری ئایینی باسی له‌وه‌ش كرد، هه‌رێمی كوردستان ئێستا خاوه‌نی پێگه‌یه‌كی به‌هێزه له بواره‌كانی سیاسی، كۆمه‌ڵایه‌تی و ئابووری و دیپلۆماسی، ته‌نانه‌ت له‌لایه‌ن وڵاتانی ڕۆژئاواوه فۆكه‌سێكی زۆر خراوه‌ته سه‌ر پێگه‌ی ستراتیجیی هه‌رێمی كوردستان و جووڵه‌یه‌كی گه‌وره له‌م ڕووه‌وه له هه‌رێمی كوردستان له ئارادایه.
بەیانیی ڕۆژی چوارشەممە 23ـی نیسانی 2025، ڕێوڕەسمی ڕۆژی نزای نیشتمانیی لە کوردستان دەست پێ دەکات، لە ڕێوڕەسمەکەدا هەر یەکە لە سەرۆک مەسعود بارزانی، نێچیرڤان بارزانی، سەرۆکی هەرێم و مەسرور بارزانی، سەرۆکی حکوومەتی هەرێمی کوردستان و چەند کەسایەتیەکی دیکەی عێراقی و جیهانی گوتار پێشکەش دەکەن.
ڕۆژی نزای نیشتمانی، ڕۆژێکە بۆ ڕێزگرتن و یادکردنەوەی پێکەوەژیانی ئاشتییانەی نێوان پێکهاتە و ئایینە جیاوازەکانی هەرێمی کوردستان. یەکەم ساڵە لە هەرێمی کوردستان بەڕێوە دەچێت و دەبێتە نەریتێکی ساڵانە.
ساڵانە ئەم ڕێوڕەسمە ئاینییە لە وڵاتانی دیکەی جیهانیش بەرێوە دەچێت، بەڵام لە هەرێمی کوردستان جیاواز دەبێت، بەو پێیەی باوەڕدار و پەیڕەوانی هەموو ئاینییەکان تێیدا بەشدار دەبن، لە کاتێکدا لە وڵاتانی دیکە تەنها پەیڕەوانی یەک ئایین بەشدار دەبن.
