سبەینێ ئینتەرنێت لە کوردستان دەبڕدرێت

گوتەبێژی وەزارەتی گواستنەوەو گەیاندنی حکوومەتی هەرێمی کوردستان ڕایدەگەیەنێت: سبەی کاتژمێر 6:30ـی بەیانی تاکو 7:45ـی بەیانی، بەهۆی تاقیکردنەوەکان لە هەرێمی کوردستان، تۆڕی ئینتەرنێت ڕادەگیرێت.

شەممە 21ـی حوزەیرانی 2025، دیلان ڕەشاد، گوتەبێژی وەزارەتی گواستنەوەو گەیاندنی حکوومەتی هەرێمی کوردستان ڕایگەیاند: سبەی یەکشەممە 22ـی حوزەیرانی 2025، تاقیکردنەوەکان لە هەرێمی کوردستان دەست پێ دەکەن، لەپێناو سەرخستنی پرۆسەکە بە بێگەردی و دوور لە گزی، ئینتەرنێت لە کاتژمێر 6:30ـی بەیانی تاکو 7:45ـی بەیانی، لە هەرێمی کوردستان دەوەستێت، ئەو پرۆسەیەش تا کۆتا تاقیکردنەوە بەردەوام دەبێت.

گوتەبێژی وەزارەتی گواستنەوە و گەیاندن گوتی: بە هەمان میکانیزمی پێشوو، تەنها لە ڕۆژانی تاقیکردنەوەکان هێڵەکانی ئینتەرنێت و هەموو جۆرە نامەیەکی (MMS) دەبڕدرێت، ئەو شوێنانەشی کە دیاریکراون کە پێویستە لە هەموو حاڵەتێکدا خزمەتگوزاری ئینتەرنێتیان هەبێت، بریتین لە:  سەنتەری زانیاری هەژماری من، لە گەڕەکی (32)ـی پارک، سەرجەم ئامێرەکانی ڕاکێشانی پارە (ATM) و سەرجەم بانکەکان، فڕۆکەخانەکانی نێودەوڵەتی هەولێر و سلێمانی، داتا سەنتەری پرۆژەی ڕووناکی و پێوەری زیرەک.

دەشڵێت: ڕاگرتنی خزمەتگوزاری ئینتەرنێت، ساڵانە لەسەر داوای فەرمی وەزارەتی پەروەردەی حکوومەتی هەرێمە بۆ ڕێگریی لە دیاردەی گزی، یاخود هەر هەوڵێکی دیکەی نا یاسایی لەکاتی بەڕێوەچوونی تاقیکردنەوەکاندا.