Çavkaniyek bo Kurdistan24ê: Pirsa mûçeyan û hinardekirina petrolê ket nav bernameya Encûmena Wezîran

Navenda Nûçeyan (K24) - Çavkaniyekê ji Kurdistan24ê re ragihand, “Pirsa mûçeyên xelkê Kurdistanê û hinardekirina petrola Kurdistanê li ser bernameya Encûmena Wezîrên Iraqê hat zêdekirin, ku biryar e bi amadebûna wezîrên Kurd bê gengeşekirin.”

Çavkaniyekê îro (Sêşem, 08ê Tîrmeha 2025ê) ji Kurdistan24ê re ragihand, “Encûmena Wezîrên Iraqê bi serokatiya Serokwezîr Mihemed Şiya Sûdanî û amadebûna wezîrên Kurd niha ji bo gengeşekirina çend mijarên giştî di civînê de ye. Biryar e di wê civînê de danûstandin li ser pirsa mûçe û hinardekirina petrola Kurdistanê bên kirin û biryara pêdivî li ser bê dan.”

Ev du roj in ku şanda Wezareta Samanên Xwezayî ya Hikûmeta Herêma Kurdistanê li Bexdayê ye, da ku li ser hinardekirina petrolê û çarekirina pirsgirêka neşandina mûçeyên mûçexurên Herêma Kurdistanê bi Nivîsîngeha Serokwezîrê Iraqê re gengeşeyan bike. Gotûbêj niha berdewam dikin, lê heta niha ji hêla Bexdayê ve biryara pêdivî nehatiye dan.