Siyasetmedarekî Sûrî: Tekane rêya parastina Sûriyeyê, sîstemeke nenavendî ye

Navenda Nûçeyan (K24) – Siyasetmedar û nivîskarê Durizî yê Sûrî Cebir El-Şofî ji K24 re ragihand, êrîşkarên ser Siwêdayê hemû çekdarên DAIŞ û çeteyên din bûn û tekez kir ku baweriya wan bi hikûmeta Şamê nemaye û çareseriya Sûriyê di sîstemeke nenavendî de dibînin.

Cebir El-Şofî diyar kir, li Siwêdayê rêkeftinek çêbûye ku armanca wê ew e ku "destêwerdana desthelata Şamê di karûbarên Siwêdayê de nebe" û divê xelkê Siweydayê bi xwe karûbarên xwe birêve bibin û hemû rêkaran ji bo parastina xwe werbigrin.

Derbarê êrîşkaran de, El-Şofî got: "Ewên ku êrîşî Siweydayê kirin hemû DAIŞ, Cebhet El-Nusra û çete bûn. Ew hemû çekdarên terorîst in ku binpêkariyên hovane li dijî Duriziyan kirin. Mal şewitandin, gund bi temamî wêran kirin û gulle rasterast li xelkê reşandin." El-Şufî destnîşan kir ku wan gelek "belge kom kirine" da ku radestî navendên navdewletî bikin.

Siyasetmedarê Durizî rexne li hikûmeta Sûriyeyê girt û wiha axivî: "Baweriya me bi vê hikûmetê û dezgehên wê nemaye. Em hêvî dikin ku dewleteke rastîn, dewleteke hemwelatiyan û dewleteke yasa û mafan were avakirin ku mafê hemû pêkhateyan, çi Kurd, çi Elewî, çi Durizî û çi Erebên Sunnî, biparêze."

Li ser paşeroja Sûriyeyê, El-Şufî çareserî di sîstemeke nenavendî de dît û got: "Divê hemû pêkhateyên Sûriyeyê daxwaza dewleteke ne-navendî bikin ku tê de her dever bikaribe bi xwe rêveberiya xwe bike. Ev ne parçebûn e, belkû berevajî, ev yekane rê ye ji bo parastina yekparçeyiya xaka Sûriyeyê."