Bo daxuyaniyên dewletê hevşaredarên DBPê li Diyarbekirê dicivin

K24 – Diyarbekir

Li ser daxuyaniyên rayadarên dewleta Tirkiyê yên li hemberî şaredariyên Partiya Herêman a Demokratîk (DBP) hemû hevşaredarên DBPê dê sibe li Diyarbekirê bicivin û  nexşerêyeke nû binirxînin.

DBPê derbarê civînê de daxuyaniyek belav kir û tê de dibêje; “Hevşaredar û xebatkarên me bi awayeke derhiquqî  têne desteserkirin, hikumet bi awayeke keyfî bi ber me de tê, em ê li ser van bûyer û îdîayên bêbingeh yên li dijî şaredariyên me têne kirin nirxandinan bikin.”

Serokomarê Tirkiyeyê Recep Tayîp Erdogan careke din gef li şaredariyên Partiya Herêman a Demokratîk (DBP) xwar û got şaredariyên DBPê pereyan ji PKKê re dişînin û ewê hesabê vê yekê bipirsin.

Li gorî daxuyaniya DBPê Hevserokê Partiya Demokratîk a Gelan (HDP) Selahedîn Demîrtaş, Hevseroka DBPê Sebahat Tuncel, Hevserokên Kongreya Civaka Demokratk (KCD)  û hevşaredarên DBPê dê beşdarî civînê bibin.

Civîn dê li Salona Şanoyê ya Şaredariya Bajarê Mezin ya Diyarbekirê saet li 10.00ê destpê bike.