DAIŞ daxwaza lêborînê ji Îsraîlê dike

K24 – Navenda Nûçeyan

Wezîrê bergîriyê yê Îsraîlê yê berê Mûşî Yalûn ragihand, DAIŞê yek carê bi şaşbûn teqe li Îsraîlê kir û DAIŞê yekser daxwaza lêborînê kir.

Kenala dehem ya Îsraîlê li ser zarê wezîrê Asayiş û bergîriyê yê Îsraîlê yê berê Mûşî Yalûn belav kir, DAIŞê ji Sûriyê ve yek carê teqe li navçeya Colanê ya di bin destê Îsraîlê de kir û yekser jî daxwaza lêborînê kir.

Yalûn amaje bi bi bûyera şeva 21 Nîsanê kir û got, gelek caran teqa li Îsralê ji aliyê artêşa Sûriyê ve li Colanê tê kirin, lê DAIŞê tenê carekê bi şaşbûn teqe kir û piştre jî daxwaza lêborînê kir.

Wî berpirsê berê yê Îsraîlê amaje bi wê yekê jî kir, Îranê li pişt wan êrîşên ku li dijî Îsraîlê tên kirin e û DAIŞê ti caran êrîşî wan nekiriye.

Îsraîlê ragihandibû, şeva 21 Nîsanê 3 mûşek ji Sûriyê ve li bilindayên Colanê ketibûn, bêyî ku ti ziyan encam bidin.

Îsraîlê jî îro navedeke “Hêzên Beraveniya Niştimanî” a ser bi rêjîma Sûriyê li ser leşkergeha Kaniya Fewar li başûrê Quneyterê bombebaran kir, di encamê de 3 leşker hatin kuştin.