Iraq bersiva gefên Erdogan dide
K24 – Navenda Nûçeyan
Wezareta Bergîriyê ya Iraqê red dike ku Tirkiyê ti operasyoneke leşkerî li Şingalê dest pê kiribe û ragihand, her êrîşeke derveyî li ser xaka Iraqê, bêdeng namînin.
Peyvdarê Wezareta Bergîriyê ya Iraqê Lîwa Tehsîn Xefacî ji ajanseke Iraqî re ragihand, “Hikûmeta federal a Iraqî derbarê destpêkirina Tirkiyê operasyoneke leşkerî li Şingalê, ti agahî nedane Wezareta Bergîriyê ya Iraqê.”
Got jî: “Agahiyên destpêkirina operasyona Tirkiyê li Şingelê dûrî rastiyê ne.”
Diyar kir jî, “Hikûmeta Bexdayê li hember destêwerdana leşkerî ya derveyî bêdeng namîne.” Herwiha got jî: “Operasyona Tirkiyê heger rast ba, dê agahiyên hikûmetê û Wezareta Bergîriyê jê heba.”
Ev daxuyaniya Wezareta Bergîriyê ya Iraqê piştî wê tê, Serokomarê Tirkiyê Recep Tayip îro li Kongreya 6emîn a AK Partî li bajarê Trabzonê gotibû: “Operasyona Şingalê destpê kiriye.”
Tirkiye dibêje, çekdarên PKKê li Şingalê ne û Tirkiye wek Efrînê dixwaze derbasî navçê bibe.
Berî du rojan jî Partiya Karkerên Kurdistanê (PKK) vekişîna ji Şingalê ragihandibû.
S. B