Iraq bi fermî daxwazê ji Tirkiyê dike dest bi hinardekirina petrola Herêma Kurdistanê bike

Wezîrê Derve yê Iraqê Fuad Husên ji K24ê re ragihand, Hikûmeta Iraqê îro nivîseke daxwazê ji Tirkiyê dike ku hinardekirina petrola Herêma Kurdistanê ji nû ve dest pê bike.

Navenda Nûçeyan (K24) – Wezîrê Derve yê Iraqê Fuad Husên ji K24ê re ragihand, Hikûmeta Iraqê îro nivîseke daxwazê ji Tirkiyê dike ku hinardekirina petrola Herêma Kurdistanê ji nû ve dest pê bike.

Îro Sêşemê 4ê Nîsana 2023an, Wezîrê Derve yê Iraqê Fuad Husên ji K24ê re ragihand, mebesta rêkeftina navbera Hikûmeta Herêma Kurdistanê û Iraqê dubare hinardekirina petrola Herêma Kurdistanê ye û gotûbêj ligel wan kompaniyên petrolê tê kirin ku petrola Herêma Kurdistanê kirrîne yan dikirrin, derbarê bihayê petrolê de, çimkî beriya niha ew kompanî bi bihayekî kêm petrola Herêmê kirrîne, lê belê niha bi wî nirxî petrol ji wan re nayê firotin.

Fuad Husên diyar kir, îro Wezareta Petrolê ya Iraqê nivîseke fermî arasteyî hikûmeta Tirkiyê dike, da ku dubare dest bi hinardekirina petrola Herêma Kurdistanê bike û got: “Ez bawer nakim kêşeyeke hikûmeta Tirkiyê derbarê vê mijarê de hebe.”

Husên herwiha ragihand: “Kompaniya Somo petrola Herêmê nafiroşe, şanda hikûmeta Iraqê bi Herêma Kurdistanê ve jî, gotûbêj li ser bihayê petrola Herêma Kurdistanê dikin. Divê kompanî bi bihayê bazar petrola Herêma Kurdistanê bikirrin, ev jî tê wê wateyê ku bihayê petrola Herêmê bilind dibe.”

Îro Sêşemê 4ê Nîsana 2023an, Serokwezîr Mesrûr Barzanî di konferansa rojnamevanî ya ligel Serokwezîrê Iraqê Mihemed Şiya Sûdanî de ragihand, “Rêkeftina di navbera Hewlêr û Bexdayê de ji bo hemû Iraqê giring e. Ez destxweşiyê li Serokwezîrê Iraqê Mihemed Şiya Sûdanî dikim ji ber vê rêkeftinê. Dixwazim pîrozbahiyê li hemû gelê Iraqê û Herêma Kurdistanê bikim ji bo rêkeftina giring. Hêvîdar im ev rêkeftin bibe bingehek ji bo çareserkirina kêşeyên hilawîstî yên di navbera Hewlêr û Bexdayê de û bibe sedema pesendkirina projeyasayên bûdce û petrol û gazê li Parlamentoya Iraqê.”

Serokwezîr MesrûrBarzanî got jî: “Piştî rawestandina petrola Herêma Kurdistanê, ziyan ne tenê li xelkê Herêma Kurdistanê bû, lê belê ziyan gihîşt tevahiya gelê Iraqê. Ev şêweyê nû yê hinardekirina petrolê Herêmê, dahata Iraqê zêdetir dike û em hemû dê sûdmend bin.”

Her wiha got: “Dixwazim hemû aliyan dilniya bikim ku mebesta me ji destpêkê ve ew bû ku em bigihin rêkeftineke baş di navbera Hikûmeta Iraqê û Herêma Kurdistanê de, bêyî ku dest ji ti mafên xwe yên destûrî berdin. Ev rêkeftin, bihêzkirina pêwendiyên di navbera Hikûmeta Iraqê û Herêma Kurdistanê de ye li ser bingeha destûr û yasayên heyî.

Di beşeke din a axaftina xwe de, Serokwezîr Mesrûr Barzanî got: “Ez dixwazim spasiya Serok Barzanî dikim ji bo piştevaniya wî ya berdewam bo me. Ez dixwazim spasiya Serokê Herêma Kurdistanê bikim ji bo berdewamiya piştevaniya vê proseyê û spasiya hemû kesên ku roleke erênî di serxistina vê proseyê de hebûye. Ez dixwazim spasiya şanda Hikûmeta Iraqê bikim ji bo piştevaniya wan ji rêkeftina ligel şanda Herêma Kurdistanê re. Her wiha dixwazim spasiya şanda Hikûmeta Herêma Kurdistanê bikim ku ji bo berjewendiya hemû îraqiyan bi awayekî gelek berfireh ev gotûbêj birêve birin.”

Mesrûr Barzanî got: “Ez bawer im vê carê jî bi amadebûna cenabê Serokwezîr dê ev rêkeftin wek xwe were cîbicîkirin. Hêvîdar im ew tîmên ku bo çareserkirina kêşeyên teknîkî yên vê rêkeftinê hatine erkdarkirin, bilez bikin ji bo temamkirina vê proseyê, ji bo xelkê Iraq û Herêma Kurdistanê zirarê nebînin.”

Serokwezîrê Herêma Kurdistanê got: “Ew pabendbûna ku hemû alî nîşan didin, hêvîdar im gerentiya wê be ku ev rêkevtin wek xwe were cîbicîkirin û ez bawer im ku ev yek dê bibe destpêkek baştir ji bo hemû hevkarî û xebata hevbeş.  Wek cenabê Serokwezîr gotiye, êdî em behsa pirsgirêkan nekin, lê belê behsa wan derfetên ku di paşerojê de di navbera Hikûmeta Herêma Kurdistanê û Hikûmeta federal de hene, bikin ku di berjewendiya gelê Iraqê de be.”

Serokwezîr Mesrûr Barzanî got: “Careke din spasiya Serokwezîr Mihemed Şiya Sûdanî dikim ku bi rastî jî wek serokwezîrê hemû Iraqê, berjewendiyên hemû gelên Iraqê û Herêma Kurdistanê jî di nav de li ber çavan girtiye û di bin çavdêriya wî de ev rêkeftin hatiye kirin, ez hêvîdar im û bawer im dê sûda wê ji hemû Iraqê re bike.”