پشتیوان سادق: پاشگه‌زبوونه‌وه‌یه‌كی ئاشكرا هه‌یه له جێبه‌جێكردنی بنه‌مای هاوبه‌شی و سازان و هاوسه‌نگی له عێراقی نوێدا
K24 - هەولێر:
وه‌زیری ئه‌وقاف و كاروباری ئایینی ئاماژه به‌وه ده‌كات حكومه‌تی هه‌رێمی كوردستان رژد بووه له‌سه‌ر ئیداره‌دانی كێشه‌كان له رێگه‌ی دانوستان و گفتوگۆوه. ده‌شڵێت، پاشگه‌زبوونه‌وه‌یه‌كی ئاشكرا هه‌یه له جێبه‌جێكردنی بنه‌مای هاوبه‌شی و سازان و هاوسه‌نگی له عێراقی نوێدا.
ئه‌مڕۆ (دووشه‌ممه 18ـی ئاداری 2024) پشتیوان سادق، وه‌زیری ئه‌وقاف و كاروباری ئایینی حكومه‌تی هه‌رێمی كوردستان رایگه‌یاند، بارودۆخی كوردستان له ماوه‌ی رابردوودا له‌گه‌ڵ حكومه‌تی فیدڕاڵ چه‌ندین گۆڕان و هه‌ستیاری به‌سه‌ردا هاتووه، به‌ڵام حكومه‌تی هه‌رێمی كوردستان به‌رده‌وام رژد بووه له‌سه‌ر ئیداره‌دانی كێشه‌كان له رێگه‌ی دانوستان و گفتوگۆوه.
وه‌زیری ئه‌وقاف و كاروباری ئایینی حكومه‌تی هه‌رێمی كوردستان ئاماژه‌ی به‌وه‌ش كرد، حكومه‌تی هه‌رێمی كوردستان ئه‌وه‌ی له ئه‌ستۆیدا بووه پێشكه‌شی حكومه‌تی عێراقی كردووه بۆ ئه‌وه‌ی چاره‌سه‌ری كێشه‌كان بكرێت و ماف و شایسته‌كانی خه‌ڵكی كوردستان به گفتوگۆ به‌ده‌ستبهێنێت.
پشتیوان سادق باسی له‌وه‌ش كرد، پاشگه‌زبوونه‌وه‌یه‌كی ئاشكرا هه‌یه له جێبه‌جێكردنی بنه‌مای هاوبه‌شی و سازان و هاوسه‌نگی له عێراقی نوێدا. روونیشیكرده‌وه، ئه‌وه‌ی ئه‌مڕۆ له عێراق له ئارادایه پاشاگه‌ردانییه و پێچه‌وانه‌ی بنه‌ماكانی پێكهێنانه‌وه‌ی عێراقی نوێیه.
وه‌زیری ئه‌وقاف و كاروباری ئایینی حكومه‌تی هه‌رێمی كوردستان سه‌رنجی بۆ ئه‌وه‌ش راكێشا، هه‌موو خه‌ڵكی هه‌رێمی كوردستان به‌یه‌كه‌وه دژی بڕیاره‌كانی حكومه‌تی عێراق بوه‌ستنه‌وه. گوتیشی، هه‌رێمی كوردستان سه‌ره‌ڕای كه‌موكوڕی و كێشه، به‌ڵام پێشكه‌وتنی گه‌وره‌ی به‌ده‌ستهێناوه.
جه‌ختیشیكرده‌وه هه‌رێمی كوردستان شوێنی ئایینداری و ره‌سه‌نایه‌تییه، له‌م چوارچێوه‌یه‌دا هه‌موو خه‌ڵكی كوردستان به‌تایبه‌ت له مانگی ره‌مه‌زاندا خۆشه‌ویستی خۆیان بۆ خاك و قه‌واره‌كه‌یان دووپات ده‌كه‌نه‌وه و به‌رگری لێ ده‌كه‌ن.
ئەمڕۆ دووشەممە، 18-03-2024، مەکتەبی سیاسیی پارتی دیموکراتی کوردستان بەیاننامەیەکی لەبارەی دۆخی ئێستای عێراق، پەیوەندییەکانی هەولێر و بەغدا، هەڵبژاردنی پەرلەمانی کوردستان، بڕیارەکانی دادگای فیدراڵی و چەند پرسێکی دیکە بڵاوکردەوە.
مەكتەبی سیاسی پارتی دیموكراتی كوردستان دەڵێت، "لایەنەکانی هاوپەیمانی ئیدارەی دەوڵەت دەخەینە بەردەم بەڕپرسیارێتیی نیشتمانی لە جێبەجێنەکردنی دەستوور و تەواوی خالەکانی رێککەوتنی سیاسی و ئیداریی پێکهێنانی کابینەی ئێستای حکومەتی عێراق بە سەرۆکایەتیی محەممەد شیاع سوودانی، بەپێچەوانەشەوە ناتوانین بەردەوام بین لە پڕۆسەی سیاسی دا".
مەكتەبی سیاسی پارتی ئاماژەی بەوەش کردووە، "لە سۆنگەی تێگەیشتنمان لە پێگە و بەرپرسیارێتی مێژووییمان لە پاراستنی مافە ڕەواكانی گەلی كوردستان و سیستەمی دیموكراسی و فيدراڵی عێراق، هەروەها ڕەوایی نەدان بە هەڵبژاردنێكی نا دەستووری و نا دیموكراسی، و وەستانەوە لە بەرامبەر سەرجەم ئەو پێشێلکاریانەی دەستوور کە لەلایەن دادگای باڵای فیدراڵییەوە بەرامبەر هەرێمی کوردستان و دامەزراوە دەستورییەکانی ئەنجام دەدرێت بەگشتی، و سەپاندنی هەموارە نادەستوریەكانی یاسای هەڵبژاردنی خولی شەشەمی پەرلەمانی کوردستان بەتایبەتی، بە بەرژەوەندی گەل و نیشتمانەکەمانی دەزانین كە پارتیمان نەچێتە ژێر باری پەسەندکردنی بریاری نادەستووریی و سیستەمێکی سەپێنراو لە دەرەوەی ئیرادەی گەلی هەرێمی كوردستان و دامەزراوە دەستوورییەکانی و بەشداری هەڵبژاردنێک نەكات کە بە نایاسایی و نادەستوری و لەسایەی سیستەمیکی سەپێنراودا بەڕێوەبچێت".