PDK piştgiriya peyama Kosret Resûl dike

K24 – Hewlêr

Cîgirê Serokê Partiya Demokrat a Kurdistanê (PDK) Nêçîrvan Barzanî piştgiriya peyama Cîgirê Yekem yê Sekreterê Giştî yê YNKê Kosret Resûl Elî kir, ya ku daxwaza lihevkirinê ji hemû aliyên Kurdistanê dike.

Nêçîrvan Barzanî di peyameke nivîskî de duh, 14ê Tebaxê, ragehand “Em piştgiriya peyama Kosret Resûl ya ji bo lihevkirinê dikin û dupat dikin ku Partiya Demokrat a Kurdistanê hewldaneke zêde ji bo yekrêziya niştimanî û duristkirina lihevkirinê dide.”

Kosret Resûl di peyamekê de daxwaza tifaqê ji hemû aliyên Kurdistanê kir û piştgîriya xwe bo projeya Cîgirê Duyem ê Setreterê Giştî yê YNK Berhem Salih eşkere kir.

Barzanî amaje kir ku hevpeymaniya stratîcîk ya di navbera PDK û YNKê de erkekî mezin dixe ser milên wan bo duristkirina lihevkirin û yekrêziya siyasî û niştimanî li Kurdistanê.

Cîgirê Serokê PDK diyar kir jî ku di baweriya wan de projeya Cîgirê Duyem ê YNKê Berhem Salih dikare wek bingeheke guftûgoyan be, bo gehêştina lihevkirin û yekrêziya ku xelk Kurdistanê ji wan hêvî dike.