فوئاد حوسێن بووە وەزیری دەرەوەی عێراق
K24 - بەغدا
ئەنجوومەنی نوێنەرانی عێراق بە ئامادەبوونی 280 پەرلەمانتار کۆبووەوە بۆ متمانەدان بە حەوت وەزیری کابینەی نوێی عێراق و، لە ئەنجامدا دەنگ بە هەر حەوتیان درا و کابینەکەی مستەفا کازمی تەواوبوو.
کاندیدەکانی مستەفا کازمی بۆ وەزارەتەکان، کە ئەمڕۆ (شەممە، 6-6-2020) متمانەیان پێدرا و بوون بە وەزیر، پێکهاتوون لە:
- فوئاد حوسێن، وەزیری دەرەوە
- ئیحسان عەبدولجەبار ئیسماعیل، وەزیری نەوت
- ئیڤان فائیق یەعقووب، وەزیری کۆچ و کۆچبەران
- عەلا ئەحمەد حوسێن، وەزیری بازرگانی
- محەممەد کەریم جاسم، وەزیری کشتووکاڵ
- سالار عەبدولستار محەممەد حوسێن، وەزیری داد
- حەسەن نازم عەبد حەمادی، وەزیری رۆشنبیری و گەشتوگوزار و شوێنەوار
فوئاد حوسێن، کە ئەمڕۆ بە دەنگی زیاتر لە 250 پەرلەمانتار بووە وەزیری دەرەوەی عێراق، پێشتر وەزیری دارایی بوو لە حکومەتەکەی عادل عەبدولمەهدی و چەند ساڵێکیش سەرۆکی دیوانی سەرۆکایەتیی هەرێمی کوردستان بووە.
فوئاد حوسێن:
- ساڵی 1946 لە خانەقین لەدایکبووە
- کاتێک لە بەغدا خوێندکار بووە، پەیوەندی بە ریزەکانی پارتی کردووە
- لە دوای نسکۆی شۆڕش کۆچی کردووە بەرەو هۆڵەندا
- لە هۆڵەندا دکتۆرای لە پەیوەندییە نێودەوڵەتییەکان بەدەستهێناوە
- جگە لە کوردی زمانەکانی: عەرەبی، هۆڵەندی و ئینگلیزیش بەباشی دەزانێت
- لە 2005 بۆ 2018 سەرۆکی دیوانی سەرۆکایەتیی هەرێمی کوردستان بووە
- 2019 وەزیری دارایی بوو لە حکومەتی عادل عەبدولمەهدی
- ئەمڕۆ (شەممە، 6-6-2020) وەکو وەزیری دەرەوەی عێراق متمانەی پەرلەمانی بەدەستهێنا