Siyasî

Hevserokê PYD: Em amadeyî danûstandinan in

Hevserokê PYD herweha got, tişta ku li Der'ayê dibe, lihevkirinek Rûsî - Israîlî ye, ji bo parastina sînorê îsraîlê ye, û piştî Der'ayê dê Rûsya berê xwe bide parêzgeha Idlibê

Kurdistan24 Hewlêr 2018/07/12 13:52

kurdistan PYD Şahoz Hesen Danûstandin Sûriye

K24 – Navenda Nûçeyan

Hevserokê PYD radighîne, Hikumet û Opozisyona Sûriyê çareseriya siyasî red kirin.

Di civînekê de ku, ji bo mamosteyên bajarokê Tirbespiyê lidarxistibû, Hevserokê Partiya Yekîtiya Demokrat PYD Şahoz Hesen ragihand, Hikumet û Opozisyona Sûriyê ji destpêka krîzê ve, çareseriya siyasî red kirin, û tekezî li ser çareseriya leşkerî kirin, lê ew wek PYD baweriya wan bi danûstandinan heye.

Hevserokê PYD herweha got, tişta ku li Der'ayê dibe, lihevkirinek Rûsî - Israîlî ye, ji bo parastina sînorê îsraîlê ye, û piştî Der'ayê dê Rûsya berê xwe bide parêzgeha Idlibê.

Şahoz Hesen diyarkir, heta niha tu danûstandinek di navbeyna wan û Hikumeta Sûriyê de çênebûye, lê ew ji bo her danûstandinekê bê merc amade ne, û Rêveberiya Xweser desthilata yek partiyê li Sûriyê qebûl nake, û ji bo parastina destkeftan ew amade ne berevaniyê bikin.

Di derbarê Destûra nû ya Sûriyê de, Hevserokê PYD got, Destûrek a ku bê wan bê danîn, nûneratiya 30 ji sedê ji xelkê Sûriyê nake, û ew ji bo beşdarîkirin di danîna Destûrê de amade ne.

C.B