تیرۆر بەو شێوەیە نییە
بیرو ڕێچکەی ویلایەتی (فەقیهـ) کۆنەو ئەوکاتە سەری هەڵدا کە ئیمامی دوانزەیەمی شیعە لە 329ی کۆچی و لە "الغيبه الكبرى" دیارنەمانە گەورەکە، کیان و حوکمرانیان لە خۆیان یاساغ و حەرام کرد و وەکیلەکانیان لەبری خۆیان دانا بۆ حوکمڕانیی و کەوتنە شوێن ئەوانیتر، ئێستاش بە بریکاریی کەس رازی نین و دەبێت خۆیان رۆڵیان هەبێت لەو پرسی بریکارسازییەدا proxy.
ئەوەی بەرە بەیانی 7/11/2021 روویدا، پەردەیەکی دراماتیکیی و شانۆیی نوێ نییەو هەیەجان و خۆ ڕەتاندنی ناوێ و هەوڵی تیرۆریستی نییە بۆ پاکتاوی جەستەیی کەسێک، ئەوەندەی کۆتایی هاتنی مۆدێلێکی بریکارییە کە بەدڵیان نەبوە بە بریکارێکی تر کە دەبێت ملکەچیان بێت.
بەدیوێکی تردا تەواوکردنی هاوکێشەکەیە بۆ کۆتایی هاتنی دەوڵەتی دامەزراوەیی کە خودی مستەفا کازمیش تیایدا شکستی هێناو ئەوە دوساڵە بانگەشەی بۆدەکات و لەسەر ئەرزی واقیع نمایشێکی میدیایی و هەڵخەڵەتێنەرانە زیاتر هیچیتر نەبووە و بینیمان چەندە هەنگاوی نا بۆ چاکسازیی؟ کازمی ئەوە چەند جارە باسکی با ئەیەن و دەیشکێنن بەبێ ئەوەی بۆ یەک جار باسکی کەسی جەڕاندبێ و شکاندبێ و هەمیشە بەو مانۆڕو شۆیانە خۆی قوتار دەکات لەو بریکارانە.
بەمانایەکی ئەوەی روویدا کردەی ئاسایی و مومارەسەی ڕۆژانەی دەوڵەتی قووڵیی مەزهەبییە بۆ تەواوکردنی پرۆسەی یەکڕەنگکردن و بە حەشدکردنی عێراق و لێدان لە جەوهەری دیموکراسیەت و یاساکان، یانی یاساو دەستوور دەبێت لە ڕەفەکاندابن و بۆ کارپێکردن نیین وەک یاساکانی حەموڕابیی، بەڵکو ئەوە جوڵەو بڕیارەکانی مەرجەعیەت و هێزو پرۆکسییە نادەوڵەتییەکانە کارایی و شەرعیەتیی هەیەو دەبێت بەردەوامیش بێت.
هەمان کات ئەوە بڕواو عەقیدەی ئایدۆلۆژیی شیعیی نەگۆڕە بۆ سیاسەت و حوکمڕانیی، ثوابت نظام المرجعية، دەبێ ئیتر بەو پرەنسیپانە کاربکرێت ئەوەش یەک مانای هەیە، رەتکردنەوەی دەستوورو هەڕەشەو سەرئێشەکانی دەوری ماڵی شیعی.
ئەوەش گوزارشتە لە رەتکردنەوەی دەرەنجامەکانی هەڵبژاردن و دەنگی خەڵک و هەر کرانەوەو پەنجەرەیەک بە ڕووی ئەمریکاو ڕۆژئاواو کوردو هێزە مەدەنیەکان و شەرعیەتدان بە چەک و توندوتیژیی و بەرەی حەشدو هێزە وەلائییە نادەوڵەتیەکانی دۆستی کۆماری ئیسلامی ئێران، ئەوەی ئەم گەمەیەش رادەگرێ ئەمریکایە، ئەمریکاش ستراتیژ نەگۆرەو بە ئاسانی دەستی ناخوێنرێتەوەو لەپشت ئیمامەکان نوێژ دادەبەستن و سەبریان تاقی ناکرێتەوە بە ئاسانیی.
ئەو دیدە ئینقیلابییەی عێراق، پێی وایە دەبێ سەرۆک وەزیران جوندی و گوێڕایەڵ بێت نەک بڕیاردەرو سەرچاوەی ترس و هەڕەشە، ملکەچی مەرجەعیەت بێ نەک یاساو بەهاکان، بە واجبی شەرعیی و مەزهەبیی خۆی هەستێت و سەربە ئال و بەیت و عەهدو پەیمانە مەزهەبیەکانی حەوزە بێت، چونکە عێراق دەوڵەتی قووڵی مەزهەبی بەڕێوەی دەبات و ئەمریکاش لەو دۆخەدا تەماشاکەر نییە بەڵکو شەریک و پلانداڕێژەرە.
بۆیە ئەستەمە گۆڕینی ئەو دیدە ئینقیلابیی و سەربازییە بۆ دیدێکی دیموکراسی و پێکەوەیی، کە تاکی عێراقی و کورد و سوننەو کەمینەکان هەست بە ئارامیی و شوناسی وەک یەکیی بکەن. هەر ئەو دیدە سەربازییە وای کردوە هیچ سەرۆک وەزیرێک نەتوانێت ئەوەندە ئازا بێت دەست بەرێت بۆ ئەو تخووب و تابۆ هەستیارانە، ئەوە پەیامەکانی پشت هێرشەکەی ماڵی کازمین و پرسەکە تیرۆر نییە بەڵکو ترساندنی سەرۆک وەزیرانی ئایندەیە تاوەکو کەمێک هۆشیار بێت چی دەکات و لەگەڵ کێ ئاواز دەژەنێ.