پێشمەرگە و حەشدی نیشتمانی لە باشیك ھێرش دەكەنەسەر داعش
K24 - دھۆك
ئەمڕۆ ھێزەكانی حەشدی نیشتمانی بە ھاوكاری ھێزی پێشمەرگە ئۆپەراسیۆنێكیان بۆ كۆنتڕۆڵكردنەوەی گوندی كانونا لە نزیك باشیك دەستپێكرد.
پەیامنێری (كوردستان24) لە میحوەری باشیك رایگەیاند " لە كاتژمێر چواری بەرەبەیانی ئەمڕۆوە ھێزەكانی حەشدی نیشتمانی بە ھاوكاری و پشتیوانی ھێزی پێشمەرگە و فڕۆكەكانی ھاوپەیمانان، ئۆپەراسیۆنێكیان بۆ كۆنترۆڵكردنەوەی گوندی كانونا، لە نزیك باشیك دەستپێكردو گوندەكەیان گەمارۆداوە".
په‌یامنێرمان وتیشی: تۆپخانەكانی پێشمەرگە بە چڕی گوندەكە تۆپباران دەكەن، ئێستا چەند قەناس بە دەستێكی داعش لە نێو گوندەكەدا ماون و شەڕ بەردەوامە".
فەرماندەیەكی پێشمەرگەش لەو میحوەرە بە (كوردستان24) ی راگه‌یاند: "ھێرشەكە ھەم ئەزموونی یەكەمە بۆ حەشدی نیشتمانی، ھەمیش بۆ ئەوەیە داعش بكێشنە دەرەوەی مووسڵ و بەرەنگاریان ببنەوە".
حەشدی نیشتمانی بۆ شەڕكردن دژی چەكدارانی داعش لە سوننە مەزھەبەكانی عێراق پێكھاتووە، ماوەیەكە لە لایەن ھێزەكانی توركیا و ھاوپەیمانان مەشقیان پێدەكرێت و یەكەم ھێرشیانە لە میحوەری باشیك بە ھاوكاری پێشمەرگە بۆ سەر داعش.
