پارتە کوردییەکان بۆ وا دەکەن؟
لە کاتێکدا هەموو جیهان باس لە رۆڵ و قارەمانیێتی پێشمەرگە دەکات، لە شەڕی دژ بە ترسناکترین رێکخراوی تیرۆریستی داعش، کە رۆژانە میدیا جیهانییەکان بە گشتی و ئەوروپییەکان بە تایبەتی. بە گرینگیەکی زۆرەوە ئاماژە بە ئازایەتی پێشمەرگە دەدەن و هاوسۆزیی خۆیان بەرامبەر بە گەلی کورد دەردەبڕن، کە ئەمەش دوژمنانی کورد و وڵاتانی داگیرکەری کوردستانی هەراسان کردووە و بەردەوام لە هەوڵ دان بۆ شکاندنەوەی بەهای پێشمەرگە و سووککردنی ئەو ناوە پیرۆزە، ئەویش لە رێگەی بەکارهێنانی پارتە کوردییەکان.
راستە خەباتکردن لە سەر خاکی کوردستان ئاسان نییە، چونکە ئەو شوێنە ستراتیژییە و جیۆپۆلیتیەی کە کوردستان هەیەتی، بە ئاسانی خەباتی تیا ناکرێ، لەبەر ئەوەی ئەو چوار دەوڵەتەی کە داگیریان کردووە، سەرەڕای هەبوونی کێشە و ناکۆکی لە نێوان خۆیاندا، کەچی تەنها لەسەر یەك دۆز و مەسەلە کۆکن، ئەویش لەناوبردنی میللەتی کوردە و هەروەها رێگەگرتنە لە هەبوونی کیانێکی سەربەخۆ بۆ کورد. بێگومان ئاسانترین رێگەش بۆ ئەو مەسەلەیە بەکارهێنانی پارتە کوردییەکانە.
بۆ نموونە شەڕە خوێناوییەکەی ساڵی 1994 کە لە نێوان هەردوو پارتە کوردییەکەی کوردستانی باشوور روویدا، ئێران وعێراقی ئەو کاتە و تورکیا رۆڵێکی سەرەکییان هەبوو لە روودانی ئەو کارەساتە بەسەر میللەتی کورد، کە لە ئاکامدا چەندین گەنجی کورد بوونە قوربانی بیرکردنەوەی تەسکی حزبایەتی لە نێوان یەکێتی نیشتیمانی کوردستان و پارتی دیموکراتی کوردستان.
هەر لە سەرەتای دروستبوونی حکوومەتی هەرێمی کوردستان، پارتی کرێکارانی کوردستانیش بە تافی ئێران هەوڵی دا ئەو ئەزموونە نوێیەی کوردستان تێکبدات.
ئەوەی جێگەی داخە ئەوەندەی ئەو پارتە کوردییانە بە گشتی بۆ بەرژەوەندی خۆیان و حزبەکەیان هەوڵ دەدەن، نیوەی ئەوەندە بۆ بەرژەوەندی تاکی کورد خزمەتیان کردبایە، ئێستا دەبووینە خاوەن وڵاتێکی سەربەخۆ و گشت مافەکانمان پارێزراو دەبوو. ئەو پرسیارەی لای هەر تاکێکی کورد دروست دەبێت ئەوەیە؛ گەلۆ لە ساڵی2017 لە سەدەی سێ هەزارە تاکەی دەبێ کورد سوود لە ئەزموونی رابردووی خۆی وەرنەگرێت؟
دوو ساڵ لەمەوبەر بە بەردەوامی باس لە کۆنگرەی نەتەوەیی کورد کرا، سەرەڕای بوونی ئایدۆلۆژیای جیاواز، بۆی هەبوو ببێتە هەلێك بۆ لێکنزیکبوونەوەی پارتەکانی هەر چوار بەشی کوردستان، بەڵام بە داخەوە لە کۆتاییدا ئەو کۆنگرەیەی کە ببووە هیوایەک بۆ تاکی کورد نەبەسترا.
ئێمەی کورد دەبێ چ هیوایەکمان بە وڵاتێکی وەك تورکیا هەبێ کە لەلایەن سوڵتانێکی وەك ئەردۆگان حوکم دەکرێ، کە بەردەوام خەریکی سەرکوتکردنی هاووڵاتیانی سڤیلی کوردە لە باکووری کوردستان. ئێمە باسی پەکەکە ناکەین، بەڵام هەدەپە وەك پارتێکی کوردی لە رێگەی دەنگدانەوە گەیشتە پەرلەمان بۆ ئەوه‌یە لە سەر مینبەری پەرلەمانەوە داکۆکی لە مافی کورد بکات و ئەو مافانە بۆ میللەتەکەی وەدەست بێنێ، کە پەکەکە لە ماوەی 40 ساڵی خەباتی چەکدارییەوە تا ئێستا نەیتوانیوە بۆ کورد وەدەستی بێنێ. کەچی ئەردۆگان ئەو سستەمە دیموکراتیەشی پێ قەبوڵ نەکرا، خۆ هەدەپە پارتێکی چەکداری نەبوو، تا ئێستا 32 پەرلەمانتاری خستە زیندانەوە، بە سەرۆکی پارتەکەو جێگرەکەشیەوە.
ئێمە چۆن دەتوانین باوەڕ بەوە بکەین کە تورکیا پاڵپشتی لە باشووری کوردستان دەکات، لە کاتێکدا زۆر بە روون و ئاشکرایی بەدەنگ هات لەمەڕ هەڵکردنی ئاڵای کوردستان لە کەرکووک و ووتی: "ئەگەر ئاڵای كوردستان لە كەركووك نەهێنرێتە خوارەوە باجی زۆر قورس دەبێت و پەیوەندییەكانمان لەگەڵ هەرێمی كوردستان تێكدەدەین". کە لە راستیدا ئەمە هیچ پەیوەندییەکی بە تورکیاوە نییە.
هەمان شت ئایەتوڵڵاکانی ئێرانیش، هەمیشە لە هەوڵی بنبڕکردنی کوردانی رۆژهەڵاتن و خەریکی نانەوەی ئاژاوەن لە نێوان پارتە کوردییەکانی باشووری کوردستان، دەبێ چ سوودێکیان هەبێت، تەنیا تێکدانی رێزی کورد نەبێ؟
ئەوەی جێگەی سەرسوڕمانە هەر هەموو پارتە کوردییەکان هەوڵی وەدەستهێنانی سەربەخۆیی دەدەن، بەڵام لە ئەرزی واقیعدا لە نێو یاریپێکردنە ئیقلیمییەکاندا ماونەتەوە. ئێمەی کورد بە قەد کۆسۆڤاشمان تیا نەبوو، کە لە شەو و رۆژێکدا سەربەخۆیی خۆی راگەیاند، بێ گوێدان بە دژایەتیکردنی وڵاتێکی زلهێزی وەکو رووسیا.