سەرۆک وەزیرانێکی بوێر، لەبەرامبەر دوو نەخێردا
(پارتی) براوەی یەکەمی هەڵبژاردنە و دروشمی سەرەکییشی بنیادنانی کوردستانێکی بەهێزە، کوردستانیش خاک و نیشتمانی مرۆڤی کوردو کوردستانییانە، مرۆڤەکانیش خەڵکن، نێرو مێ و چین و توێژو تاکەکانی ئەم ماڵە گەورەیەن. بەهێزیی هەر ماڵێکیش لە بەهێزیی ئەندامانی خێزان و لاوازییشی لە لاوازیی تاکەکانییەوە سەرچاوەدەگرێ. بەهێزیی هەر نیشتمانێکیش لە بەهێزیی تاکەکانێتی و لاوازییشی لە لاوازیی ئەوانەوەیە. کەوایە دەبێ پرۆسەی بنیادنانی کوردستانێکی بەهێز لە دروستکردنی تاکی بەهێزەوە دەسپێبکات. تاکی بەهێزیش لە فەرهەنگی میللەتانی پیشکەوتوودا واتا : تاکێکی خوێندەواری هۆشیاری پڕ زانیاری. تاکێکی ئەقڵانی و بەشکۆو ڕێزلێگیراو. تاکێک کە دەروونی بە جوانییەکانی هونەرو ئەدەبی میللەتەکەی و میللەتانی تر شۆرابێتەوە. تاکێکی تەندروستی چوست وچالاکی بەهرەدار و بەبەرهەم. تاکێک کە مێشک و خەون و خولیای خۆی بۆ خۆشەویستی و خزمەتی خەڵک و خاکەکەی تەرخانکردبێت!
بۆیە بەر لە هەموو شت پێویستە سەرۆک وەزیرانی نوێ و ئەندامانی تیمەکەی تێگەیشتنیان بۆ هەندێ چەمکی سیاسی و فیکری بگۆڕن و بوێرانە لەگۆشەنیگایەکی سەردەمیانەوە هەڵسەنگاندن و نرخاندیان بۆ بکەنەوە. بۆ نموونە:
یەکەم : کاتی ئەوە هاتووە لە هەرێمی کوردستاندا تێگەیشتنمان بۆ چەمکی وەزارەتی سیادی بگۆڕین. چونکە بەم تێگەیشتنەی ئێستامانەوە تەنها چەند وەزارەتێک لە بازنەی سیادیدان و چاوی تەماع وتموحی زۆربەی حیزبەکانیان لەسەرەو هەوڵێکی زۆر بۆ بەدەسهێنانیان دەدرێ: ( پێشمەرگە، ناخۆ، دارایی، پەیوەندییەکانی دەرەوە و سامانە سروشتییەکان) .ڕاستییەکەی کورتکردنەوەی چەمکی سیادی لەو چەند وەزارەتەدا گوزارش لە تێگەیشتنێکی کلاسیکی ماوە بەسەرچوودا دەکات و بەهانای ئەم سەردەمە و ئەم قۆناغە مێژووییەی هەرێمی کوردستانەوە نایەت.
ئەو وڵاتانەی ساڵانێک پێش ئێستا لەهەمان ئەم قۆناغ وهەلومەرجەی ئێستای هەرێمی کوردستاندا بوون، بەبڕیاڕێکی بوێرانە سەرتاپا تێگەیشتن و تێڕوانینی خۆیان بۆ بەهاو گرنگیی کایەکانی ژیان و ئیدارەدانی گوزەرانیان گۆڕی. لە ڕیزبەندیی بەهادا پلەی یەکەمیان بۆ بواری پەروەردە و فێرکردن و خوێندنی باڵا و توێژینەوەی زانستی تەرخانکرد، پاش ئەوانیش بوارەکانی تەندروستی و ڕۆشنبیری و کشتوکاڵ وئاودێری و پیشەسازی هاتن.
لە وڵاتانی وەک ژاپۆن و کۆریای باشوورو مالیزیا و سەنگاپوردا، پەروەردەو فێرکردن و خوێندنی باڵاو تەکنیکی، کرانە سەرمەشقی پرۆسەی دروستکردنی تاکێکی بەهێز و بەهرەدار و بەبەرهەم بە ئامانجی بونیادنانی وڵاتێکی بەهێزو ئاوەدان. زانست و تەکنیک و هونەر بوون بە خەون و خولیا، کتێبیش بە هاوڕێی تەمەن، مووچەی مامۆستا هاوتای مووچەی وەزیرێک کراو هەیبەت و شکۆی ئیمپراتۆریکیشیان پێ بەخشی... کار گەیشت بەوەی هیچ کەسێ زات نەکات پێ بە سێبەری مامۆستادا بنێ!! کایەکانی ڕۆشنبیری (فیکرو هونەرو ئەدەب و وەرزش ) فۆکەسیان خرایەسەر و توانا و سەرمایە و هەلیان بۆ ڕەخساندن تا لەو ڕێیانەوە سەرچاوەکانی بەهرەو تونای داهێنانی تاکەکان ببوژێنەوەو شوناسی میللەتەکانیان بەدنیا ناساند و سەرمایە ڕەمزییەکانی خۆیان بەرز ڕاگرت.. گیانی خۆڕاگری و خۆشەویستیی خود و خاک و خەڵک و خوێندنەوەیان لەناخی تاکی هاووڵاتیدا چاند!
ئەگەر ئێمە و سەرۆکی حکومەتی داهاتووشمان چەند پرسیارێکی زۆر سادە لەخۆمان بکەین بۆمان ڕوون دەبێتەوە کە ئیتر دەبێ چی بکەین و چی نەکەین!:
ئایا تاکی کۆڵکە خوێندەوار و خوێندکاری ئامادەنەکراوی بەکۆیلەکراوی سیستم وپرۆگرام و ژینگەیەکی نادروستی پەروەدە و خوێندنی باڵای پڕ لە پارادۆکس و بێ بەرهەم و بێ بەهرەو بێ سەلیقەی دوورە پەرێزو کۆنەخوازو نامۆ بەزانست و فیکر و ئەدەب وهونەرو هوشیاری، تا چ ڕادەو ئاستێک خاک و خەڵک و نیشتمانی خۆی خۆشدەوێت؟ ئایا... جگە لە ئامادەگیی عاتیفییانەی خۆ بەقوربانیکردنی نیشتمان، چیی تری لەدەست دێت بۆ ئەو نیشتمانەی بکات؟ ئایا لەتوانایدایە کەلاوەکانی گوندەکەی ئاوەدان و شەقام و کۆڵانی شارەکەی و ماڵە هەژارەکان ڕۆشن و باخچە پیس وسیسەکانی وڵات خاوێن بکاتەوە؟ ئایا تاکێکی لەو جۆرە بۆرە لەتوانایدایە کارگە داخراوەکان بەگەڕ بخاتەوە؟ دەشت ودەری بەرفراوانی وڵات سەوزپۆش ڕەزوباخی تێراوو بکاتەوە؟ ئایا تاکێکی نائومێدی مەرگدۆست و نوقمی خەمۆکی، چاوەڕێی لێدەکرێ ڕەففە چۆڵەکان پڕ لەکتێب و کتێبخانەو شانۆو سینەما بێ نازەکان پڕ لە جووڵە و ژیان بکاتەوە؟ ئایا تاکی دەستو پێ سپیی سست و خەواڵوی پشت مێزی ئۆفیسەکانی حکومەت و سەرومل شۆڕی سەر فەیسبووک، دەتوانێ سەبەتە و خوانی ڕەنجدەرانی بیرو بازوو پڕ بەرەکەت و بەرهەمی خۆماڵی بکاتەوە؟
وەڵام: نەخێر!!
ئایا چاوەڕوانیی چیمان لە ژمارەیەکی زۆری تاکەکانی میللەتێک دەبێت، جەستە شەکەت و سست و ناساغ بن، بەسەدان هەزاریان خەمی هەرە گەورەیان بەدەسهێنانی حەب و چارەسەری نەخۆشییە درێژخایەنەکانیان بێت.. لەناو قاوشی ساردو بێ خزمەتی نەخۆشخانەی حکومیی بێ دەرزی وبێ دەرمان و بێ ئیتیکی پزشکیدا، وێڵ و سەرگەردان بن و وەک نێچیرێکی بێ چارەو بەستەزمان کەوتبنە بەر ڕەحمەتی کەڵبەی نەخۆشخانەی ئەهلی و قاچاخچیی ویژدان مردووی دەرمانی ساختە.. ئایا چاوەڕوانیی چیت لەم جۆرە خەڵکە دەبێت (کە تەنانەت لەژیانی خۆشیان بێزارن)! ئایا نیشتمانێکی زامدار و لاوازو گیرۆدەی دەستی ناحەز و پڕ قەیران و ئاریشە، بەم خەڵکە لاوازکراوە بێنازکراوە، بەهێز دەکرێت؟
وەڵام : نەخێر!!
بۆ حکومەتێکی بوێرو تەکنۆکراتی دوور لە نمایش و فڕکە فڕکی کاروانی ئۆتۆمبێلی جام ڕەش، ئەو دوو نەخێرە زەقە، خێردارن و مایەی بەهۆش هاتنەوەو بەخۆداچوونەوە و ڕاستبوونەوە و هەڵسانەوەن!
دووەم: وەزارەتەکانی (پەروەردە، خوێندنی باڵا، ڕۆشنبیری، تەندروستی و کشتوکاڵ) کە بەتێگەیشتنە نوێیەکەوە، دەکەونە ناو بازنەی سیادییەوە، پێویستە بە ڕێکاری پرۆفیشناڵ و میکانزمی زانستی مامەڵەیان لەتەکدا بکرێ و نەخرێنە بەر نەشتەری حیزب حیزبێنە و بەش بەشێنە و ڕازیکردنی ئەم حیزب و ئەو حیزب.
با سەرۆکی کابینەی نوێی حکومەتی هەرێمی کوردستان، بە بوێری و پڕکێشییەوە لەو پێنج وەزارەتە بڕوانێ و وەک پێنج وەزارەتی سیادیی هەرە گرنگ بۆ ئێستا و بیست ساڵی داهاتوومان، بیریان لێ بکاتەوە و لە دەرەوەی پێودانگ و بگرەو بەردە و دانوستاندنی سیاسی، بەمیکانزمی پێشکەشکردنی سیڤی بڕیاریان لەسەر بدات، بەو هەڵوێستەش مێژوویەک بۆخۆی و حیزبەکەی تۆماردەکات و دەبێتە پێشەنگ و سەرمەشقی نەریتێکی بوێرانە بۆ هەر کەسێک لەپاش ئەو لەم وڵاتە دەسەڵات دەگرێتە دەست.
کوردستانێکی بەهێز، سەرۆک وەزیرانی حکومەتێکی بەهێزی دەوێت کە بڕیارێکی دروست و مێژوویی بدات و ئەو میکانزمە ئەقڵانییە بوێرە جێبەجێبکات کە لەبەغدادی پایتەختی بێ پایەو تەختدا، بوو بەژێر دەست و پێلەقەی سیاسییە شکستخواردووە گەندەڵەکانی عێراقەوە!