وەزیرانی پەروەردە و خوێندنی باڵا لەبارەی پرۆسەی خوێندن روونكردنەوە دەدەنە پەرلەمان
K24 - ھەولێر
ئەمڕۆ وەزیرانی پەروەردە و خوێندنی باڵا و توژینەوەی زانستی لەگەڵ لیژنەی پەیوەندیدار لە پەرلەمانی كوردستان كۆدەبنەوە و لەبارەی چارەنووسی پرۆسەی خوێندن و چەند بابەتێكی دیكەی پەیوەست بە قوتابخانە و زانكۆ و پەیمانگاكان روونكردنەوە دەدەنە پەرلەمان.
ھۆشمەند سادق، پەیامنێری كوردستان24 لە زاری سەرچاوەیەك لە پەرلەمان رایگەیاند، ئەمڕۆ ئالان حەمەسەعید وەزیری پەروەردە و ئارام محەمەد، وەزیری خوێندنی باڵا و توێژینەوەی زانستی لەگەڵ لیژنەی پەروەردە و خوێندن لە پەرلەمانی كوردستان كۆدەبنەوە و روونكردنەوە لەبارەی چارەنووسی پرۆسەی خوێندن و چەند بابەتێكی دیكە دەدەنە لیژنەكە.
بەگوێرەی زانیارییەكانی پەیامنێرمان وەزیرانی خوێندنی باڵا و پەروەردە و لیژنەكەی پەرلەمان گفتوگۆ لەسەر چەند تەوەرێك دەكرن كە بریتین لە:..
-پلانی ھەردوو وەزارەت بۆ دڵنیابوون لە چارەنووسی پڕۆسەی خوێندن
- تاوتوێکردنی کرێی خوێندنی پاڕالێل و زانکۆی تایبەت و قوتابخانەو پەیمانگاکان
- چارەنووسی کۆلێژی زانستە تەندروستییەکان
- چارەنووسی240 قوتابی و زانکۆی ستراتفۆردی ئەمەریکی
- گرفتی دابەزاندنی خوێندنی قوتابیان لە زانکۆکان
- چارەنووسی وانەبێژان و ماف و شایستە داراییەکانیان
- تاقیکردنەوەی تەمھیدی پۆلی 12ی ئامادەیی بە ھەموو بەشەکانیەوە لە قەزاکان بکرێت
- مەرجی دووساڵ خزمەتی دامەزراندنی پزیشکی ددان بۆ مومارەسەکردنی پیشەی خۆیان
-مۆڵەتی خوێندن بۆ مامۆستایان و فەرمانبەرانی وەزارەتی پەروەردە بۆ خوێندنی باڵا.
-پێوەری وەرگرتنی قوتابیان لە قوتابخانە حکومییەکانی ئینگلیزی