HSD û hikûmeta Sûriyeyê li Parîsê dicivin
Navenda Nûçeyan (K24) – Fermandarê Giştî yê Hêzên Sûriya Demokratîk (HSD) Mezlûm Ebdî, ji bo civîneke girîng bi şandeke hikûmeta Sûriyeyê re, diçe paytexta Fransayê, Parîsê. Tê payîn ku ev hevdîtin bi serpereştiya Fransa û Amerîkayê birêve biçe.
Li gorî zanyariyên medyayî, di vê serdanê de Hevseroka Daîreya Peywendiyên Derve ya Rêveberiya Xweser Îlham Ehmed û hejmarek berpirsên din bi Mezlûm Ebdî re ne.
Şanda hikûmeta Sûriyeyê jî dê bi serokatiya Wezîrê Derve Es'ed Şeybanî beşdar bibe. Herwiha Nûnerê Taybet ê Amerîkayê bo Sûriyê Thomas Barak û berpirsên payebilind ên Fransayê jî dê di civînê de amade bin.
Hate diyarkirin, amadekariyên ji bo vê civînê berî çend rojan ji aliyê Wezareta Derve ya Fransayê ve hatine kirin û dê di bin çavdêriya rasterast a Serokê Fransayê Emmanuel Macron de were lidarxistin.
Armanca sereke ya van hevdîtinan ew e ku rêyên gihîştina lihevkirinekê ji bo tevlîkirina Hêzên Sûriya Demokratîk (HSD) di nava artêş û saziyên dewleta Sûriyeyê de bên gotûbêjkirin.
Ev hewldana nû piştî wê yekê tê ku danûstandinên meha borî yên di navbera şanda Rêveberiya Xweser û hikûmeta Sûriyê de li Şamê bêyî ti encam bi dawî bûbûn. Sedema sereke ya têkçûna wan danûstandinan, redkirina Şamê ya ji bo sîstema nenavendî bû.
