Hesabê Donald Trump ê Twitterê bi awayekî mayînde hat rawestandin

Navenda Nûçeyan (K24) – Kompaniya Twitterê ji ber belavkirina "tundî û aloziyê", hesabê Serokê Amerîkayê Donald Trump rawestand.

Twitter di daxuyaniyekê de diyar kiriye: “Piştî gelek hûrbîniyên li ser hesabê Donald Trump, me biryar da bi awayekî mayînde hesab were rawestandin.”

Li ser sedema girtina hesabê Serokê Amerîkayê ragihandiye; ji bo ku tundiya zêdetir çênebe, hesab hatiye girtin.

Şeva çarşemê bi dema Hewlêrê, alîgirên Trump li dijî ragihandina biserneketina Trump di hilbijartinên Serokatiya Amerîkayê de, çûn ser avahiya Encûmena Nûneran a Amerîkayê, di encama bûyerê de çar kes hatin kuştin û çend kesên din jî birîndar bûn.

Piştre Donald Trump ji alîgirên xwe daxwaz kir ku biçin malê û aştiyê biparêzin, lê têkçûna di hilbijartinan de qebûl nekir.