Serokwezîr Mesrûr Barzanî pêşwazî li Serokê Parlamentoya Iraqê kir
Hewlêr (K24) – Serokwezîrê Herêma Kurdistanê Mesrûr Barzanî îro duşemê 3yê Gulana 2021ê pêşwazî li Serokê Parlamentoya Iraqê Mihemed Helbûsî kir.
Di hevdîtinê de pêşhat û geşedanên Iraqê û herêmê hat gotûbêjkirin, bi taybetî amadekariyên pêkanîna hilbijartinên bê yên Iraqê û girîngiya zemînxweşkirina li ber hilbijartinên pak û paqij ku maf û daxwaza hemû pêkhateyên cuda yên Iraqê desteber bike.
Herwiha tekezî li pêwîstiya çareserkirina kêşeyên rawestandî yên navbera Herêma Kurdistanê û hikûmeta federalî hat kirin bi awayekî bingehîn û li ser bingeha destûrê.
Di beşeke din a civînê de amaje bi metirsiyên terorê bi giştî û gefên DAIŞê hat kirin, ku di çendîn deverên Iraqê de gefa rasteqîn in li ser jiyana xelkê, li ser vê mijarê tekezî li girîngiya hemahengiya ewlehiyê ya navbera Pêşmerge û artêşa Iraqê û yekxistina hemû hêz û şiyanan hate kirin ji bo rêgirtina li gef û metirsiyên terorê.
