Goranê helwesta xwe li ser hilbijartinên Parlamentoya Kurdistanê eşkere kir

Hewlêr (K24) – Şandeke Serokatiya Herêma Kurdistanê li Hewlêrê ligel berpirsên Tevgera Goran civiya, Rêkxerê Jûra Parlamentoyê yê li Tevgera Goran eşkere kir; ew ligel wê yekê ne ku hilbijatinên Parlamentoya Kurdistanê di dema xwe de were kirin.

Rêkxerê Jûra Parlamentoyê yê li Tevgera Goran Kardo Mihemed ji rojnamevanan re diyar kir: “Ji aliyê yasayî ve Serokatiya Herêmê bi diyarkirina roja hilbijartinê ve pêwendîdar e.”

Kardo Mihemed diyar kir: “Tevgera Goran pêwîst dibîne ku hilbijartin di dema xwe de were kirin, lê belê yasa di xizmeta bihêzkirina parlamento û hilbijartineke pak û paqij de be.”

Mihemed destnîşan kir: “Em di wê baweriyê de ne ku divê yasaya hilbijartinan bi awayekî be ku kesên xwedî biryara siyasî werin nava parlamentoyê, da ku parlamento bihêz bibe.”

Li ser mijara destûrê, Kardo Mihemed diyar kir; di civînê de ligel şanda serokatiya Herêma Kurdistanê tekezî li wê yekê hatiye kirin ku destûreke hevdem û demokrat ji bo Herêma Kurdistanê pêwîst e.

Îro duşemê 14ê Sibata 2022yan şandeke Serokatiya Herêma Kurdistanê li ser mijara nivîsandina destûrê û hilbijartinên bê yên Parlamentoya Kurdistanê, li Hewlêrê serdana Tevgera Goranê kir.