Stranbêj Azad Bedran ji ber gotina Kurdistanê tê sizakirin
K24-Amed
Gelek caran hunermendên Kurd ji ber ku Kurdayetiya xwe pirsgirêkên Kurdan di hunera xwe de dikin mijar rastî astengî û sizadanê têm Herî dawî jî mînaka vê yeke di sizadana Muzîkjen Azad Bedran de xwe da der. Azad Bedran ji ber ku di konset û klîpên xwe de cih daye gotina Kurd û Kurdistanê bi bangeşîkirina rêxistina neyasayî tê tohmetbarkirin û heta di encama doza ku di sala 2018an de lê hatiye vekirin de bi 3 sal û 9 mehan sizayê zindanîkirinê le hatiye birrîn. Azad Bedran amaje dike ku mixabin mînakên vê rewşê pirr in û ew di wê baweriyê de ye pergalek wiha heye ku li hember hemu rengên Kurdî bertek tê nişandan û hemu tiştên derbarê Kurdî de tên krîmînalîzekirin.
Azad Bedran (Muzîkjen) got:"Bi rastî ev doz ne ji bo şexsê min hatiye vekirin.Piştî rewşa awarte êrîşek mezin hember çanda Kurdan destpê kir. Gelek hunermend, siyasetmedar û rojnamevan di girtîgehan de ne. Stranên ku ez dixwînim ji aliyê wezareta çandê ve jî hatine pesendkirin lê dîsa jî doz bo wan stranan vedibe."
Azad Bedran piştî ku ji ber stranên bi Kurdî hatiye sizadan derbarê wî de dozek din jî hatiye vekirin ku parvekirinên wî yên medyaya civakî wek sedem hatine nîşan dan. Parêzerê Azad Bedran Soran Haldî Mizrak dide zanîn ku sizayê Azad Bedran ê 3 sal û 9 meh ji aliyê dadgeha herêmî ve hatiye betalkirin û dosyaya wî bo dadgehê paşve hatiye rêkirin. Lê dîsa jî doz didome.
Soran Haldî Mizrak (parêzerê Azad Bedran) dibêje:"Azad Bedran ji ber ku bi zimanê xwe stran gotiye tê sizadan. Huner divê di çarçoveya azadiya ramanê de were nirxandin. Lê em dibînin ku pergala hiquqê wiha lê nanêre. Dadgeha herêmî biryara sizadanê betal kiriye û doz ji nû ve tê dîtin. Biryar ji aliyê ûsûlê ve hatiye betalkirin. Gotine delil baş nehatine berhevkirin. Em hêvî dikin ku hiquq were cîbicîkirin û ji ber hunera xwe ti hunermend neyên sizadan."
Azad Bedran di sala 1989ê de li Sêwerega Rihayê hatiye dine û dibêje dema wî çavên xwe li dinê vekiriye bavê wî di girtîgehê de buye. Sedema wê jî ew e ku bavê wî wê demê bandên stranên bi Kurdî difiroşt û ji ber vê jî hatibû zindanîkirin û vê yekê bandorek mezin li wî kiriye û wî jî biryar daye ku bi zimanê xwe stranan bibêje.