ENKS: Niha zemîneke baş ji bo destpêkirina civînên diyaloga Kurdî heye
Navenda Nûçeyan (K24) – Endamê Desteya Serokatiya ENKSê radigihîne, niha zemîneke baş ji bo destpêkirina civînên yekrêziya Kurdî heye.
Şandeke Desteya Serokatiya Encûmena Niştimanî ya Kurdî li Sûriyê (ENKS) ji Rojavayê Kurdistanê gihîşt Hewlêrê û bi amadebûna Serokê ENKSê Siûd Mela bi Komîta ENKSê ya Pêwendiyên Derve û Nûnerê ENKSê di nava Hevpeymaniya Niştimanî ya Opozîsyona Sûriyê (Îtîlaf) de civiya.
Derbarê pirsa diyaloga Kurdî ya di navbera ENKS û PYNKê de, Endamê Desteya Serokatiya ENKSê Mihemed Îsmaîl ji K24ê re ragihand, “Di dema borî de civînên diyaloga Kurdî ji ber binpêkirinên PYNKê hatibûn rawestandin, lê vê dawiyê û piştî serdana Cîgirê Nûnerê Amerîka yê Taybet ji bo Sûriyê David Brownstein bo ofîsa me ya li Qamişlo, niha hin pêşketin wê derbarê de çêbûne û hêvîdar in di demeke nêzîk de dest bi danûstandinan were kirin.”
Mihemed Îsmaîl tekez kir jî, çavê gelê Rojavayê Kurdistanê li serkeftina diyaloga Kurdî ye û ew çaverê ne ku zemîneke baş peyda bibe û zehmetî û astengiyên rûbirûyî wan dibin bi dawî bibin.
Li ser rola Amerîka, Mihemed Îsmaîl diyar kir, aliyê Amerîka cidî ye ku yekrêzî di navmala Kurdî de çêbibe û hebûna wê li deverê jî girêdayî yekrêziya Kurdî ye yekhelwestiya pêkhateyên din jî hebe.
ENKS û PYNKê ji Mijdara 2019'an ve bi piştgiriya Amerîka, Herêma Kurdistanê û Hêzên Sûriyeya Demokratîk (HSD) danûstendinên yekrêziya Kurdî û beşdariya ENKSê di nava Rêveberiya Rojavayê Kurdistanê de dikin, lê demek e danûstandin rawestiyane.
