سەرۆکی میت لەگەڵ فراکسیۆنەکانی پەرلەمانی تورکیا تاوتوێی پرۆسەی ئاشتییان کرد

سەرۆکی دەزگای هەواڵگری تورکیا لەگەڵ فراکسیۆنی پارتی یەکسانی و دیموکراسی گەلان (دەم پارتی) لە پەرلەمانی ئەو وڵاتە تاوتوێ پرۆسەی ئاشتی و چەکدانانی پەکەکەیان کرد.

دووشەممە، 21ی تەممووزی 2025، ئیبراهیم کاڵن، سەرۆکی دەزگای هەواڵگری تورکیا (میت) لە چوارچێوەی هەوڵەکان بۆ سەرخستنی پرۆسەی نوێی ئاشتی لە تورکیا و باکووری کوردستان، سەردانی سەرۆک فراکسیۆنەکانی پەرلەمانی وڵاتەکەی کرد.

لە سەردانەکەی دا، بە جیا لەگەڵ دەوڵەت باخچەلی، سەرۆکی مەهەپە، دواتر لەگەڵ سەرۆک و جێگری سەرۆک فراکسیۆنی ئاکپارتی کۆبووە.

هەروەها دوای نیوەڕۆ، سەردانی دەم پارتی کرد و لەگەڵ تولای هاتیمئۆغوڵاری و تونجەر باکرهان، هاوسەرۆکانی دەم پارتی و هەروەها گوڵستان کڵچ کۆچیغیت و سەزایی تەمەللی، جێگرانی سەرۆکی فراکسیۆنی دەم پارتی کۆبوویەوە، لە کۆبوونەوەکە دا تاوتوێ پرۆسەی نوێی ئاشتی و پرۆسەی چەک دانانی پەکەکەیان کرد.

هاوکات باس لەوە دەکرێت ڕۆژی پێنجشەممە لەگەڵ بەرپرسانی ئیی پارتی و لەگەڵ ئۆزگور ئۆزەل، سەرۆکی جەهەپە کۆببێتەوە.

ئەمە لە کاتێکدایە سەردانەکەی کاڵن لە کاتێکدایە چاوەڕێ دەکرێت لە ڕۆژانی داهاتوودا کۆمیسیۆنێکی پەرلەمانی بۆ پرۆسەی نوێی ئاشتی دابمەزرێت و زەمینەی یاسایی بۆ پرۆسەی چەک دانانی پەکەکە ئامادە بکات.

ڕۆژی هەینی 11ـی تەممووزی 2025 گرووپێکی 30 کەسی پەکەکە لە ڕێوڕەسمێکدا لە ئەشکەوتی جاسەنە لە ناوچەی سوورداشی پارێزگای سلێمانی چەکەکانیان دانا.