عەلی باپیر راست دەكات.. هەرێم هی ئەو نییە!

عەلی باپیری سەرۆكی كۆمەڵ، ئەمڕۆ راگەیێندراوێكی بوغزاوی پڕ لە كینی بڵاوكردووه‌تەوە و ئازادیخوازی و عەدالەتخوازی بە خەڵك دەفرۆشێتەوە.

1- روونترین وشەی ناو راگەیێندراوەكە وشەی هەرێمەكەتانە. بەڵێ زمان درۆ ناكات. مامۆستا! خۆی بە خەڵكی هەرێم نازانێت و وەك بڵێی خەڵكی شوێنێكی تر بێت و وەك كەسێك دەڕوانێتە هەرێم، كە نە پەرۆشیی هەرێمە و نە بڕوای بە دۆزە باڵاكانی ئەم هەرێمەش هەیە. سایكۆلۆژیای وشەی هەرێمەكەتان بەڕوونی پێشان دەدات، كە ئەم زاتە رقی لە خەڵكی هەرێمە. هۆكارەكەشی ئەوەیە كە گەلی كوردستان وەڵامی موزایەدات و نیفاقی ئەم جۆرانەیان داوەتەوە و دەنگیان پێ نەدا. حزبەكەی عەلی باپیر لە هەڵبژاردنی رابردوو، تەنیا یەك كورسی هێنا و هەمووشمان چاك دەزانین، كێ بوو دەنگی بۆ كورسیەكەی كۆمەڵ كۆ دەكردەوە.

2- زمانی راگەیه‌ندراوەكە تا بڵێی لە ئاستێكی نزم دایە. ئەمە زمانی سیاسی و عاقل و موسڵح و چاكەخوازان نییە. زمانی شەڕ و تەنگپێهەڵچنین و وروژاندن و بێباكیە. ئەگەر عەلی باپیر بڕوای بە قەزیەی كۆمەڵگە و پەروەردە هه‌با و خەمی وڵاتی هەبا هەرگیز رێگەی بەخۆی نەدەدا بەم زمانە بێتە ئاخافتن.

3- خەڵكی كوردستان زۆر چاك بەرهەم و هەڵێنجراوی ژوورە تاریكەكانی فیكر و ئایدیۆلۆژیا و گومڕایی و نیفاق و داعشپەروەری دەناسنەوە. بیریشیان دێت میدیای عەلی باپیر لە كاتی شەڕی داعشدا چۆنچۆنی شەڕی دەروونی لەگەڵ هێزی پێشمەرگە دەكرد. ئێستاشی لەگەڵ بێ عەلی باپیر و مەدرەسەكەی بە بەها باڵاكانی گەلی كوردستان تەنگاو و نامۆن. كار بۆ شتێك دەكەن، كە لە بنەڕەتدا پەیوەندی بە گەلی كوردستانەوە نییە و خزمەتی جۆرەكانی داگیركاری دەكەن.

4- مێژوویەكی زۆر دوور نییە، خەڵكی كوردستان رەفتار و كردەوەكانی گرووپ و تاقمە توندڕۆكانی بیر ماوەتەوە.. جەنابی مامۆستا. چیی خەراپە دەرهەق به‌ ئازادی، ئافرەت، گەنج، كۆمەڵگە، پێكەوەژیان و پەیامی مرۆڤسالارانەی ئایینەكان كردووتانە. ئاوڕێك لە مێژووی خۆت بدەره‌وە و سەیری ئاوێنە بكە، تێدەگەی كە خەڵك ناحەقیان نییە هەمیشە بە گومانەوە لە ئێوە ده‌ڕوانن.

5- نەك تەنیا خەڵكی كوردستان لێتان رازی نییه‌، بەڵكو كەوادیرانی كۆمەڵیش رۆژانە لەدەست ناعەدالەتی و ئۆلیگارشی و خۆبەزلزانین و تەماحی بنەماڵەیی ئێوە لەناو حزبەكەتان گلەییان هەیە.

6- ڕیفراندۆم دەنگی رەوا و حەقی گەلێكی ستەمدیدە بوو، قوربانیی نیفاقی ئێوە و ناپاكانە. ئەوەی گاڵتە بە دەنگی رەوا و دلێری میللەتەكەی دەكات، چۆن دەتوانێ بەناوی خەمخۆری میللەت قسە بكات.

7- بە تەئكید هەرێمەكەمان پێویستی بە ئیسڵاح، چاكەخوازی، پێداچوونەوە و باشتربوونە، بەڵام بە دڵنیاییشەوە پێویستی بە نیفاق و داعشباوەڕی و بیری توندڕۆیی نییە.