هاووڵاتیەك لە کیێڤەوە رووداوەکانی ئەمڕۆی ئۆکرانیا بۆ کوردستان24 دەگێڕێتەوە
"خۆم لانیکەم گوێم لە 10 تەقینەوە بوو لە کیێڤ"
K24 - هەولێر:
ئینا کنێدیك، ئەندامی کۆمەڵەی بازرگانانی ئۆکرانیا بە کوردستان24ـی راگەیاند، ئێستا لە کیێڤم، ئەمڕۆ کاتژمێر 06:30 خولەکی بەیانی زەنگی ئاگادارکردنەوە لێدرا، کاتژمێر هەشت یەکەم تەقینەوە روویدا، خۆم لانیکەم گوێم لە 10 تەقینەوە بوو لە کیێڤ.
کنێدیك باس لەوە دەکات، لە هەواڵەکاندا روونە کە تەقینەوەی زیاتر روویانداوە و ناوەندی شارەکە کراوەتە ئامانج و، مووشەکێك لە پارکێکی منداڵانی نزیک زانکۆی شێڤچێنکۆ کەوتە خوارەوە.
ئەو ئەندامەی کۆمەڵەی بازرگانی ئۆکرانیا بە کوردستان24ـی گوت: بەرەبەیانی ئەمڕۆ لە شاری کیێڤ کارەبا بڕدرا، بەڵام ئێستا کارەبا گەڕاوەتەوە. میترۆکان وەستان و ئێستا وەک پەناگە بەکاردەهێندرێن. هەمووان هەوڵدەدەن گیانی خۆیان بپارێزن یان لە پەناگەکاندا یان لە کۆریدۆرەکان.
ناوبراو ئاماژەی بەوەشدا، بە گوێرەی راگەیەندراوی شارەکە بەلایەنی کەمەوە پێنج کەس گیانیان لەدەستداوە و 12 کەسی دیکەش برینداربوون. هاوکات لەگەڵ ئەم هێرشانەدا، ئەم بەیانییە سەرتاسەری ئۆکرانیا هێرشی کراوەتە سەر.
بەپێی زانیارییەکان، شارەکانی کیێڤ، کیرۆڤۆگراد، دنیپرۆ، ئیڤانۆ-خارکیڤ، لڤیڤ، ژیتۆمیر، کرێمنچوک و میکۆلایڤەوە بۆردوومان کراون.
ئەمرۆ بەیانی رووسیا 75 مووشەکی ئاراستەی شارە جیاوازەکانی ئۆکرانیا کرد وەک وەڵامێک بۆ تەقاندنەوەی پردی نێوان رووسیا و کریمیا.
ڤۆڵۆدیمێر زیلێنسکی، سەرۆکی ئۆکرانیا رایگەیاند، وڵاتەکەیان لەژێر هێرشێکی چڕی مووشەکیدایە و ڤلادیمێر پوتن، سەرۆکی رووسیاش جەختدەکاتەوە لەوەی، هێرشەکە تەنیا هۆشدارییەک بووە بۆ ئۆکرانیا و گوتیشی: ئۆکرانیا بە دیفاکتۆ چووەتە ریزی گرووپە تیرۆریستییە نێودەوڵەتیییەکان.
