تەحەددیاتا پۆپۆلیزما ڕاستڕەو و ڕۆڵێ تەکنۆکراسیێ

تەحەددیات و دەرفەتێن پۆپۆلیزما راسترەو د گەل هەلبژارتنێن ڤان چەند روژێن بهێت یێت پەرلەمانێ ئێکەتیا ئەوروپا کو دێ ل 9ێ مەها 6 برێڤەچن، هەمی چاڤ لسەر زێدەبوونا پۆپۆلیزما راسترەون، کو ئەڤە دبیتە ئاماژەیەک بو خالەکا وەچەرخانا ئەگەری د د سیاسەتا ئەوروپادا.

پارت و سەرکردەیێن راسترەو ل زوربەیا وەلاتێن ئەندامێن ڤێ ئێکەتیێ لسەر ئاستێ نیشتیمانیدا د زێدەبوونێدانە لەورا ئەڤ چەندە دبیتە ئەگەرێ هندێ کو ئامادەبوونەکا زێدەتر بەرەڤ ئاستێ ئێکەتیا ئەوروپا ببەن. ئەڤ چەندا هەنێ دبیتە ئەگەرێ دروستبوونا پرسیارێن مینا وێ کو ئێکەتیا ئەوروپا چەوا دێ سەرەدەریێ دگەل پرسێن هەڕە گەرمدا کەت ئەو ژی پرسا کوچبەران، پشتەڤانی ل ئوکرانیا بەرامبەر روسیا و سیاسەتا دەرڤەیا هەڤبەش.

سەرهلدانا پۆپۆلیزما ڕاسترەو:

پۆپۆلیزما ڕاسترەو د چەند دەهەیێن ڤێ داویێ ل ئەوروپا ب شێوەیەکێ بەرچاڤ و بەربەلاڤ بەرەڤ زێدەبوونێ یە. پارتێن وەکە فیدێزی یا هنگاریا و پارتا یاسا و دادپەروەری یا پۆڵەندا نها ل ڤان وەلاتێن ناڤهاتی لسەر دەسهەلاتێنە و ل وەلاتێن مینا ئیتالیا، فینلەند و ڕومانیا پارتێن تەقلیدیێن راستا ناڤەراست دگەل توێژێن ڕادیکالێن دی هەڤپەیمانیان پێکدئینن کو د نها دا ئەڤ رەوتا داویێ ئانکو یا پارتێن تەقلیدیێن راستا ناڤەراست باندوور لسەر ئێکەتیا ئەوروپا یا هەیی. هاتن و زێدەبوونا راسترەوان ب هەر جورەکێ خوڤە بوویە ئەگەرێ هندێ کو هەلبژارتنێن ڤێ جارێ یێن پەرلەمانێ ئێکەتیا ئەوروپا توندتر بن.

پشتەڤانی ل ئوکرانیا و پەیوەندیێن دگەل ڕوسیا:

شەڕێ دناڤبەرا ڕوسیا و ئوکرانیادا کو پتری دوو سالانە بەردەوامە بویە خاڵەکا گرنگ بو سیاسەتا دەرڤە یا ئێکەتیا ئەوروپا. پارتێن پۆپۆلیستێن ڕاسترەو هەلوێستەکێ جیاواز بەرامبەر ڤی شەڕێ ناڤهاتی هەیە، لێ گەلەک ژ وان بانگەشەیێ بو هەڵویستەکێ پراگماتیتر و روبرووبونێ بەرامبەر روسی دکەن. ئەڤ چەندا هەنێ بەروڤاژی وێ هێلا بهێزا لایەنگریا ئوکرانیانە کو نها سەرکێشیێ ل ئەوروپا دکەت. ئەگەر پارتێن پۆپۆلیستێن ڕاسترەو رێژەیا کورسیێن خو ل پەرلەمانێ ئەوروپادا زێدە بکەن و ببنە خودان کاریگەریەکا زێدەتر دشێت ببیتە دەستپێکا گوهرینا داینامیکا ئێکەتیا ئەوروپا د پشتگیریکرنا ئوکرانیا بەرامبەر ڕوسیا کو هەمان هەلوێست دهێتە پێشبینی کرن بەرامبەر سەرکەفتنا دونالد ترامپی د هەلبژارتنێن بهێت یێن ئەمریکادا. 

سیاسەتا دەرڤەیا هەڤبەش: 

هەروەسا سەرهلدانا پۆپۆلیزما ڕاسترەو دشێت باندوورێ لسەر سیاسەتەکا هەڤگرتی یا دەرڤەیا ڤێ ئێکەتیێ بکەت. ئەڤ چەندا هەنێ ڤەدگەریتەڤە بو هندێ کو پارت و لایەنگرێن ڕاستەوان پتڕ تەکەزیێ ل سەروەریەکا نیشتیمانی لسەر پرسێن نەتەوەیی دکەن و نەڤێن کو پرسێن دیارکرنا رێرەوا سیاسەتا دەرڤەیا وان د ئاستێ ئێکەتیا ئەوروپادا بیت لەورا زێدەبوونا کاریگەریا وان دێ بیتە ئەگەرێ پارچەپارچەبوونا سیاسەتەکا هەڤگرتی بەرامبەر پرسێن گرێدایی ب سیاسەتا دەرڤەیا ئێکەتیا ئەوروپا. ئەڤ چەندا هەنێ دشێت ببیتە ئەگەرێ هندێ کو ڕولێ ئێکەتیا ئەوروپا وەکە مەزنترین بەخشێنەرێ هاریکاریان لسەر ئاستێ جیهانێ بکەڤیتە ژێر مەترسیێ کو راستەوخوو باندوورێ لسەر وان وەلاتان دکەت کو پێویستی ب هاریکاریێن دارایی یێن ئێکەتیا ئەوروپا هەنە بو نمونە وەلاتێن ئەفریقا. 

وەچەرخانەکا تەکنیکی:

بو تێگەهشتنێ ژ بو ڤی دیمەنێ نویێ سیاسی، ئێکەتیا ئەوروپا ڕێبازەکا تەکنۆکراتیتر یا گرتیە بەر، ب تایبەتی د پرسا کۆچبەراندا. ئەڤ ستراتیژیەتە کو تەکەزیێ لسەر شەهرەزایی و کارامەیێ دکەت، ڕەنگە بێلایەن دەرکەڤیت لێ مەترسیا دویرخستنا پڕۆسەیا دیموکراسیەتێ و کێمبوونا متمانەیا هاوولاتیان ب ئێکەتیا ئەوروپا هەیە. پۆپۆلیزم و تەکنوکراسی هەلوێستەکێ دژە سیاسی و هەڤبەشێ هەی کو ب رێیا راگەهاندنەکا  سیستەماتیک و گەلەک جاران فێیک نیوز پروپاگەندەیا وێ چەندێ دکەن کو تاکە چارەسەریا کێشەیێن بەروکا ئێکەتیا ئەوروپا گرتیە ل دەف وان هەیە و ئەڤ چەندا هەنێ دبیتە ئەگەرێ دروستبوونا کێشەیەکا مەزن بو لایەنێ لیبراڵێن دیموکرات کو ئەڤە پتری چەند دەهەیە سەرکێشیا دەسهەلاتا ئێکەتیا ئەوروپا کریە. 

ئەنجام:

د دەمەکێدا کو ئێکەتیا ئەوروپا ئامادەکاریێ دکەت بو دەنگدان د هەلبژارتنێن پەرلەمانی، ئەڤ ئێکەتیە روبروویی تەحەددایا سەرەدەریکرنێ دگەل پۆپۆلیزمێن راسترەو بوویە، دهەماندەمدا دگەل راستگوویی دگەل وان بەهایێن دیموکراسیێ کو ئەڤ ئێکەتیە لسەر هاتیە دامەزراندن، ئەڤ چەندا هەنێ ب تایبەتی د پرسا کۆچبەران و برێڤەبرنا سنوران ئەندامێن ڤێ ئێکەتیێ توشی ئالنگاریێن مەزن کرینە. بو چارەسەرکرنا ڤان ئالنگاریێن ناڤهاتی، سیاسەتەکا زێدەتر و ئێکگرتیتر پێویستە نەک زێدەبوون و کویربوونا دووبەرەکیان. پۆپۆلیزم تنێ برێیا سیاسەتەکا سەرکەفتی و ئاشکەرا کو د بەرژەوەندیا گشتیدا ببیت دشێت شکەست پێ بهێتەدان گەر نا دێ وێنەیێ دووبارەبوونا ئایدلووژیێن نازی مینا دەستپێکا سەدێ بیستێ دووبارە بن کو ئاسایێشا ڤی کیشوەری و هەمی جیهانێ ئێخستبوو مەترسیێ و نها هەمان وێنە دووبارە دبیت دگەل جیهانەکا مەترسیدارتر ب هەبوونا چەکێن جیاواز و هزڕێن توندرەوتر. لەورا گرنگە کو ئێکەتیا ئەوروپا ب هەڤسەنگیەکێ دناڤبەرا پراگماتیزمێ و بهێزیا پرەنسیپیدا ڤان تەحەددایێن ناڤهاتی سەرەدەریێ دگەلدا بکەت بو وێ چەندێ کو ئێکەتی و دیموکراسیێ د جیهانەکا نها یا دابەشبووییدا مسۆگەر بکەت.