هەنگاوەکان ئومێد بەخشن

هەردوو سەرۆکایەتی هەرێم و حکوومەت هەنگاوەکانیان چڕ و خێراتر کردووە، یەکیان بۆ بەهێزی پێگەی هەرێم و  یەکخستنی نێوماڵی کوردی، ئەویتریشیان بۆ باشترکردنی ژیانی خەڵك و نەهێشتنی گەندەڵی و رۆتین، هەرچەندە رێگای هەردووکیان هەوراز و سەختی زۆری تێدا ماوە و وا بە ئاسانی ناتوانن بەسەر هەموو کۆسپ و کەلەرێکدا زاڵبن، چونکە راستەڕێ بوونی سیستەمی ئیداری بەهەموو جومگەکانیەوە کات و ئیمکانییەتێکی زۆری دەوێ، بەڵام ئەمە مانای وا نییە کە هەر نەکرێ، راپۆرتی سەد رۆژی بەیانکراوی سەرۆکی حکوومەت شتگەلێکی زۆری تێدا بوو، لە هەمووشی گرنگتر ئەوە بوو، ویستی چاککردنێکی بەهێزی بۆ ئێستا و ئایندە تێدا بوو، کە ئومێدێکی زۆری لە دڵ و دەروونی خەڵکدا چاند، ئەو سێکتەرەی هەرە گرنگە بۆ ئەمڕۆی خەڵکی کوردستان کە ئیشی بە پەلەی تێدا بکرێ تەندروستی، کشتووکاڵ و پەروەردەیە، كەرتی تەندروستی لە هەرێم ماڵ وێرانییە، خوا بکات هیچ خێزانێك نەخۆشێکی درمی تێدا نەبێ، ئەگەرنا جگە لەوەی چارەسەر ناکرێ ماڵیشی تێدا وێران دەبێت، لە نەخۆشخانەی ئەهلی نرخی یەك شەوی ژووری بۆژانەوە بەیەك ملێۆن دینارە، رەنگە پرسیار بکەن بۆچی دەبێ بچێتە ئەهلی با بڕواتە حکوومی‌؟ لە حکوومی وێڕای پیس و پۆخڵی ئەبێ دەرمان لە دەرەوە بکڕێ، دکتۆریش لەبەر عیادەکەی و نەشتەرگەریەکانی دەرەوەی نەخۆشخانەی حكوومی وەك پێویست نایگاتە سەری. زیندانەکانمان گەلێك لە نەخۆشخانە حکوومیەکانمان خاوێنترن، دڵنیام هاوڵاتی سەرپشك بکەن لەنێوان نەخۆشخانەی حکوومی و زیندان ئەوە بێ دوودڵی زیندان هەڵدەبژێرێ. لە هەرچوار پارێزگای هەرێم تەنیا یەك جیهازی لێزەر هەیە، ئەویش رۆژێك ئیش دەکا و دووان تێکچووە، جگە لەمەش بەپێی قسەی دکتۆر خۆی، لە سی نەخۆش زیاتر ناتوانێ وەرگرێ ئەوەی تر ئەبێ چاوەڕواني مردن بکا، یان ئەبێ بڕواتە دەرەوەی وڵات، بۆیە پەلەکردن لە چارەسەرکردنی کەرتی تەندروستی زۆر پێویستە، چونکە كەسی نەخۆش عەقڵیشی نەخۆش دەبێت، هەروەها پەروەردە و کشتووکاڵیش بەهەمان دەردی تەندروستیەوە دەناڵێنن، رێگەدان بە کردنەوەی ئەو هەموو قوتابخانە ئەهلیە بێ کواڵیتیانە، بووه‌تە هۆی وێرانبوونی کەرتی گشتی پەروەردە، کە دواجا کاریگەری زۆر خراب لەسەر دەروونی هاووڵاتیان دروست دەکات، بۆیە زاڵبوون بەسەر هەموو ئەو کێشە حەیاتیانە وا ئاسان نییە، بەڵام ئەوەی جێگەی ئومێدە بوونی ئیڕادەی چاککردنە کە ئەمڕۆ هەموو هاووڵاتیان هەست بە بوونی ئەو ئیڕادەیە دەکەن.

بەهەمان شێوەش سەرۆکی هەرێم لە بەردەم بارودۆخێکی زۆر ئاڵۆزی هەرێمایەتیدایە، بەتایبەتی بارودۆخی ئەمڕۆی عیراق و سەرەدەری لەگەڵکردنی وا ئاسان نییە، چونکە مەسەلەکە هەرعیراق نییە، بەڵکو گرێدراوی کۆمەڵێك رەهەندی هەرێمایەتی و نێودەوڵەتییە، کە راگرتنی هاوسەنگیەکان لە نێوان ئەو هەموو جەمسەرانەدا زۆر زەحمەتە، بەڵام سەرۆکی هەرێم لە خاڵێکی سەرەکیەوە دەستی پێکردووە، ئەوێش پتەوکردنی نێوماڵی سیاسی گەلی کوردستانە، چونکە بەبێ گه‌رەنتیبوونی ئەم خاڵە ناتوانرێ لە هیچ پنتێکەوە دەست پێبکرێ، بەڵام ئەمەش بەبێ هاوکاری لایەنە سیاسیەکان بەتەنیا بە سەرۆکی هەرێم ناکرێ، لەو باوەڕەدام ئاڵۆزی باروودۆخی عیراق سەربکێشێ بۆ دووبارە بنیاتنانەوەی نەخشه‌ی سیاسی لەو وڵاتە، چونکە هەموو ئاماژەکان ئەوەمان پێدەڵێن: کە چیتر عێراقی دوای سقوت نامێنێ، بەڵکو ئەمجارە عێراق ناونیشانێکی تری دەبێ، کە چەند مانگێکی تر هەموومان ئەو ناونیشانە دەزانیین، بۆیە لەسەر کورد پێویستە خۆی بۆ ئەو قۆناغە ئامادە بکات، یان رەنگە بەهۆی بەرپابوونی شەڕی ناوخۆش ئەو ناونیشا وا ئاسان یەکلا نەبێتەوە، بەڵام زوو یان درەنگ ئەمە هەر دێت، نوخبەی حاکمی ئەمجارەی عیراق وەک دیارە له دەستوورەوە دەست پێدەکەن، خاڵی سەرەکیش لێدانە لەو دەستکەوتانەی کورد، بۆیە ئەرکی ئەمجارەی سەرۆکی هەرێم و سەرۆکی حکوومەت زۆر گرانتر دەبێ، چونکە دووچاری ماراسۆنێکی تری رووبەروبونەوەی هەمەلایەنە دەبنەوە.