هەنگاوێکی باش.. بەڵام دوای چی؟

دواجار ئەنجومەنی بەڕێوەبردنی خۆسەری رۆژئاوا بڕیاری ئاشتەوایی لەگەڵ هێزەکانی بەرەی ئەنەکەسە دا، بەڵام وەك عەرەب دەڵێن: دوای خراب بوونی بەسڕا، ئەم هەنگاوەی ئیدارەی خۆسەری رۆژئاوا ئەگەرچی درەنگ وەختە و دوای ماڵوێرانییەکی زۆری خەڵکی رۆژئاوایە، بەڵام ئەگەر تەکتیك نەبێت و راستگۆبن لەگەڵ بڕیارەکانیان، ئەوە هەنگاوێکە بە ئاراستەیەکی دروست کە ئومێد دەخوازین سەربکێشێ بۆ راستکردنەوەی کۆی بڕیارو سیاسەتەکانیان، چونکە ئەوان سیاسەتێکی دووژمنکارانەیان لەگەڵ هەرچی هێزو لایەنی سیاسیی کوردیە لە رۆژئاوا پەیڕەوکردووە، لەگەڵ لایەن و پێکهاتە غەیرە کوردییەکانیش سیاسەتێکی نەرم و نیانیان پەیڕەو کردووە، تەنانەت ناوی هێزە سەربازییەکەشیان هیچ پاشگرێکی کوردی پێوەنییە.

بۆ رەچاوکردنی هەستی نەتەوەکانی تر ئەم کارەیان باشبوو، بەڵام لەگەڵ ناوخۆی کوردی هیچ هێزێکی سیاسی قبوڵ ناکەن، ئەگەر هاتباو لە سەرەتا پابەندی رێکەوتنەکانی هەولێر و دهۆك بوونایە و سیاسەتی فرەییان پەیڕەوکردایە درووشم و ئاماژەکانی پەکەکەیان بەکار نەهێنابا و پێشمەرگەکانی لەشکری رۆژیان وەك هێزی کوردستانی وەرگرتبایە، لەو باوەڕەدابووم ئەم هێرشەی تورکیاش بەو شێوەیە نەدەبوو، چونکە تورکیا رێگەنادەت لە سەر سنوورەکانی خۆی پەکەکە حوکمڕانی بکات، ئەگەر هێزی رای گشتی جیهانیش نەبووایە نە ئەمریکا و نە هیچ وڵاتێکی تر لەسەر رۆژئاوا وەدەنگ نەدەهاتن.

پەکەکە پێویستە ئەو راستیە بزانێ کە گۆڕەپانی خەباتی ئەوان تەنها باکوورە بەدرووستکردنی حزبی پاشکۆی خۆیان لە پارچەکانی تری کوردستان هیچ سوودێکی بۆ گەلی کوردستان نییە، جگە لە ئاڵۆزترکردنی کێشەی کورد نەبێ لەو پارچانە، سەرەڕای ئەمەش زەمانی تاک حزبی نەماوە، لە هیچ کونجێکی ئەو دنیایەدا نابینی کۆمەڵگەیەك لەسەر یەک حزب کۆك بن، مەگەر بە دیکتاتۆری نەبێ، ئەگەر ئەمە بۆسەردەمێکیش راست بووبێ، بەڵام بۆ ئەمڕۆ ئەستەمە ئەم فۆڕمە قبوڵکراو بێ، هەروەها تاك ئایدۆلۆژی و تاك حزبی و تاكڕەوی بە ئەزموون لە هەموو جیهان شکستی هێناوە و تازە هیچ کومەڵگەیەك ناگەڕێتەوە سەری، فرەیی کە خاسیەتێکی سەرەکی دیموکراتییە، هاوكات ناسنامەی ئەمڕۆی هەموو کۆمەڵگەیەکە، بەهۆی پێشکەوتنە تەکنۆلۆژییەکان و ئامرازه‌كانی پەیوەندیکردن و بە جیهانیبوون.

ئەمڕۆ سەردەمیێکی جیاوەزە ئامانجی مرۆڤیش بۆتە رەفاهیەت، چیتر لەوە دەرچووە مڕۆڤ تەنها بەشووناس بژیت، شووناس ئەگەر لەگەڵ خۆیدا ماف بۆ مرۆڤ نەهێنێ دوای چەند ساڵێك بۆ ئەوانەی ئاستی هۆشیاریشیان نزمە و زەمەنێك خەباتیان بۆ کردووە دەبێتە شتێکی هیچ، وەک چۆن ئەمڕۆ لە باشووری عیراق خەڵکەکەی چیتر شووناسی مەزهەبگەرای شیعە ناکەنە پێوەری ژیان و ئێستا داوای ماف دەکەن. شووناس گرنگە، بەڵام ماف لە شووناس گرنگترە بۆ مرۆڤ، جیا لەمەش بە درێژای مێژوو هیچ هێزێکی ئایدۆلۆژی جا هەر ئایدۆلۆژیایەك بێت نەیتوانیوە لانی کەمی ماف و ئازادی بۆ خەڵك دابین بکات.

هەرەسهێنانی بلۆکی  کۆمۆنیستی جیهانی بەهۆی پیلانی سەرمایەداریەوە نەبوو، بەڵکو بەهۆی نەبوونی ماف و ئازادییەوە بوو، دیموکراتی بۆتە دوافۆڕمی ژیانی مرۆڤایەتی، جگەلەم سیستەمەش هیچ هێزێك و ئایدۆلۆژیایەك نەیتوانیووە کۆمەڵگە ئاسوودەبکات. ئەو جووڵانەوەی ئەمڕۆ جیهانی عەرەبی گرتۆتەوە ساڵانێکی زۆربوو دەسەڵاتدارانیان وەهمی ئایدۆلۆژیای عرووبە و لەناوبردنی ئیسرائیلیان دەرخوارد دەدان، لەکۆتاییدا بۆیان دەرکەوت جگە لە وەهم و چەواشەکردن نەبێ شتێکی تر نییە، بۆیە چیتر پێویست ناکات کورد چل ساڵی تر چاوەڕێ بێ تا بۆی دەرکەوێ کە هێزی ئایدۆلۆژی نەك هیچ مافێکی بۆ دابین ناکات، بەڵکو دەبێتە سەرچاوەی شکستێکی گەورەی شوناسەکەشی.

ئەوەی ئەمڕۆ پەکەکە لەگەڵ کومەڵگەی کوردی دەیکات، دروست ئەوەیە کە ئەو هێزە ئایدۆلۆژییە شکستخواردووانەی ناو مێژووی کۆن و نوێ لەگەڵ کومەڵگاکانیان کردوویانە.